Danir koma að opnun nýrra matvöruverslana

Verslunarkeðjan Super 1 (Einn) mun fylla í skarð þriggja Bónusverslana sem loka á höfuðborgarsvæðinu á næstu vikum. Danskt fyrirtæki kemur að opnuninni en einn eigenda keðjunnar telur að fjölskyldutengsl sín muni ekki standa í vegi virkrar samkeppni.

„Við ætlum að bjóða upp á gott úrval og vera með verð sem fólk sættir sig algjörlega við og er samkeppnishæft á þessum markaði,“ segir Sigurður Pálmi Sigurbjörnsson en hann er einn þeirra sem standa að opnun keðjunnar.

Til stendur að opna þrjár verslanir Super 1 á næstu mánuðum en auk verslunarinnar á Hallveigarstíg mun Super 1 opna í húsnæði Bónus í Faxafeni og á Smiðjuvegi. Eigendur Super 1 fá lyklana að Hallveigarstíg á föstudag og stefna að því að opna þar fyrstu verslunina í lok febrúar. Við opnunina munu Sigurður Pálmi og félagar njóta liðsinnis að utan. 

„Ég er að vinna þetta í samvinnu við danskt fyrirtæki sem er mjög reynslumikið á verslunarmarkaðnum,“ segir Sigurður. „Við munum fá mjög flottar, gæðavörur frá merki sem verður betur greint frá síðar. Ég er algjörlega sannfærður um að þetta eru vörur sem fólk mun læra að meta og treysta um ókomna framtíð.“

 

Stendur vaktina og þiggur ábendingar

Margir íbúar Þingholtanna lýstu yfir áhyggjum sínum þegar fregnir bárust af lokun lágvöruverðsverslunarinnar í hverfinu. Sigurður Pálmi segist vilja taka mið af þessum röddum og ætlar sjálfur að standa á bakvið búðarborðið og taka á móti ábendingum.

„Ég ólst hérna upp og bý rétt hjá. Ég hef tekið eftir því að fólk hefur beðið um meira úrval og kannski aðeins rýmri opnunartíma og ég held að við ættum að geta orðið við því,“ segir Sigurður. „Svo verð ég verslunarstjóri hérna til að byrja með og ég verð á staðnum. Fólk getur því komið til mín og komið með ábendingar. Ég vil vinna þetta með fólkinu í hverfinu og viðskiptavinum verslunarinnar,“ bætir hann við.

„Það er kannski eitthvað sem þekkist yfirleitt ekki lengur, að fólk geti komið og talað við kaupmanninn. Ég verð hins vegar hér og tek við ábendingum frá viðskiptavinum, því þetta er nú einu sinni fólkið sem borgar laun mín og starfsfólksins.

Óttast ekki að fjölskyldutengslin flæki reksturinn

Sigurður Pálmi er sonur Ingibjargar Pálmadóttur, en hún er stór hluthafi í Högum sem rekur meðal annars verslanir Bónus. Sigurður telur þó að það muni ekki flækjast fyrir samkeppnisrekstrinum. „Nei, tengsl mín við Haga eru náttúrulega engin. Það eru auðvitað fjölskyldutengsl en þau skipta litlu máli í stóru myndinni. Það eru engin dagleg rekstrartengsl þannig að ég hef engar áhyggjur af því – ég fagna bara samkeppninni ef hún verður einhver,“ segir Sigurður.

Breki Karlsson, formaður Neytendasamtakanna, tekur í sama streng. „Við neytendur hljótum að fagna allri samkeppni, á öllum mörkuðum, hvar sem hún birtist því hún er neytendum til hagsbóta.“