Reynolds leigði einka­flug­vél fyrir Elísa­betu þegar hún greindist með krabba­mein á loka­stigi

Vala Matt hitti Elísabetu Ronaldsdóttur í þættinum Ísland í dag í gærkvöldi en hún er ein af bestu kvikmyndaklippurum heims.

Elísabet var á dögunum tilnefnd til Eddie-verðlaunanna sem besti kvikmyndaklippari Ameríku fyrir myndina Deadpool 2 með Ryan Reynolds.

Í miðri klippivinnu veiktist Elísabet af krabbameini og var nær dauða en lífi. Og þá tóku Hollywood stjarnan Ryan Reynolds og leikstjóri myndarinnar til sinna ráða og leigðu einkaflugvél og flugu með hana til Los Angeles til að koma henni í réttar læknishendur.

„Það er alltaf gaman að fá tilnefningar, ég neita því ekkert og þetta var bara frábær endir á ömurlegu ári,“ segir Elísabet.

„Við erum sem sagt að taka upp í Vancouver Deadpool sem var mjög skemmtilegt og bara allt í einu hætti líkaminn að vinna. Ég fór að finna fyrir mikilli þreytu og hætti að geta borðað. Svo kom í ljós að ég var með æxli á brisinu, krabbamein og æxli sem kallast sortuæxli í brisi. Ég er svo ótrúlega heppin að það var ekki alveg að haga sér eins og það á að gera. Þetta á það til að dreifa sér rosalega hratt en það gerðist ekki í mínu tilfelli.“

Leyndarmálið sem var ekki hægt að halda leyndu

Þegar þarna er komið við sögu gripu þeir Ryan Reynolds og leikstjórinn David Leitch inn í.

„Ég er komin inn á spítala og er búinn að vera þar í tvo mánuði og búin að fá dauðadóm. Það átti að gefa mér sex mánuði með lyfjagjöf því ég var með þetta á lokastigi. Það var öllum mjög brugðið því þetta gerðist svo skyndilega,“ segir Elísabet en samstarfsfélagar hennar fundu þá sérfræðing í þessari tegund af krabbameini.

„Þá þurfti að koma mér til hans í Los Angeles og ég man þegar ég vaknaði í Los Angeles sagði ég við son minn, vá ég vissi ekki að ég væri með svona góða tryggingu. Máni sonur minn varð allur skrýtinn á svipinn og ákvað að segja mér sannleikann. Þá sem sagt borguðu þau flugið undir mig. Ryan og David og allt liðið.“

Svo í framhaldinu var búið til sérstakt klippiherbergi fyrir hana því þeir vildu ekki missa hana frá klippivinnunni.

Innslagið í heild sinni má sjá hér að neðan.