Þurfti sálfræðimeðferð eftir hlutverkið

Leikarinn Michael B. Jordan sló algerlega í gegn sem illmennið Eric Killmonger í Marvel-snilldinni Black Panther sem kom út á síðasta ári.

Jordan segist hafa þurft að fara í mikla sálfræðimeðferð eftir hlutverkið sem Killmonger en hann setti sig það vel inn í karakterinn að það kostaði sitt.

Þessi 31 árs leikari segist hafa einangrað sig mikið í öllum undirbúningi fyrir hlutverkið.

„Ég fór til sálfræðings og byrjaði að tala við fólk og jafnaði mig hægt og rólega,“ segir Jordan í samtali við People.

„Ég taldi að Erik [Killmonger] hefði verið mikið einn á sínum uppvaxtarárum og því mjög einmanna,“ segir Jordan og bætir við að karakterinn hafi einfaldlega heltekið hann og það hafi verið mjög erfitt að venjast hefðbundnu lífi eftir ferlið.