Hailey og Justin fresta brúðkaupinu fyrir geðheilsuna

Justin Bieber og Hailey Bieber hafa ákveðið að fresta brúðkaupsveislu sinni svo Justin geti einbeitt sér að geðheilsu sinni og vellíðan. People greinir frá þessu. 

Hjónin gengu leynilega í það heilaga hjá sýslumanni síðasta haust eftir að Justin bað Hailey í sumarfríi þeirra á Bahama-eyjum þann 7. júlí á síðasta ári. Þau hafi ætlað sér að halda stóra athöfn fyrir ættingja og vini en frestað því til þess að einblína á Justin.

„Hann vill vera besti mögulegi eiginmaður fyrir Hailey. Það er eitt að glíma við erfiðleika þegar maður er einhleypur en þegar þú ert giftur er hamingja tveggja aðila í húfi,“ sagði heimildarmaður í samtali við People. 

Að sögn heimildarmannsins ákvað Justin sjálfur að leita sér hjálpar vegna þunglyndis og var sú ákvörðun fyllilega studd af Hailey. Þá séu erfiðleikar Justin ekki vegna erfiðleika í hjónabandinu heldur sé þetta persónulegt mál sem hann þurfi að vinna úr.