Flautumark skaut Jóni Guðna og félögum út úr Evrópudeildinni

Krasnodar datt út á grátlegan hátt úr Evrópudeildinni í kvöld er þeir gerðu 1-1 jafntefli við Valencia í síðari leik liðanna. Jón Guðni Fjóluson spilaði allan leikinn fyrir Krasnodar og lék vel.

Leikurinn var liður í 16-liða úrslitum Evrópudeildarinnar en Valencia vann fyrri leikinn á Spáni, 2-1. Það var því allt opið fyrir síðari leikinn í Rússlandi í kvöld.

Það var markalaust allt þangað til á 85. mínútu er Magomed-Shapi Suleymanov kom Krasnodar yfir með glæsilegu skoti. Markið gerði það að verkum að Rússarnir voru á leið áfram.

Það var hins vegar á þriðju mínútu uppbótartíma sem Goncalo Guedes skoraði af stuttu færi úr vítateignum og jafnaði fyrir Valencia. Samanlagt því 3-2 og Spánverjarnir komnir áfram.

Napoli er komið í átta liða úrslitin þrátt fyrir 3-1 tap gegn Salzburg í kvöld. Napoli vann fyrri leik liðanna 3-0 og Arkadiusz Milik kom þeim yfir í kvöld.

Því voru Ítalarnir komnir í góða stöðu en slökuðu full mikið á. Munas Dabbur jfnaði á 25. mínútu og tvö mörk í síðari hálfleik dugðu ekki heimamönum. Carlo Ancelotti og lærisveinar því komnir áfram.