Þór/KA skoraði sex mörk á hálftíma

Þór/KA valtaði yfir Selfoss 6-0 er liðin mættust í Lengjubikar kvenna í fótbolta á Akureyri í dag. Öll sex mörk leiksins komu á hálftíma kafla í fyrri hálfleik.

Sandra Stephany Mayor kom Norðankonum af stað með fyrsta markinu á 14. mínútu leiksins og Margrét Árnadóttir bætti öðru við fimm mínútum seinna.

Á 27. mínútu skoraði Arna Sif Ásgrímsdóttir þriðja mark Þórs/KA og Karen María Sigurgeirsdóttir kom heimakonum í 4-0 á 28. mínútu eftir sendingu Mayor.

Mayor var svo aftur á skotskónum á 39. mínútu og síðasta mark leiksins gerði Arna Sif á 44. mínútu. Ekkert mark var skorað í seinni hálfleik og endaði leikurinn í 6-0 sigri Þórs/KA.

Eftir fjóra leiki í Lengjubikarnum er Þór/KA því með sjö stig og fer upp fyrir Breiðablik í annað sætið en Selfyssingar eru á botninum án stiga.

Upplýsingar um úrslit og markaskorara eru fengnar frá Úrslit.net.