Vara við svikahröppum sem nýta sér gjaldþrot WOW air

Kortafyrirtækið Valitor varar fólk við svikahröppum sem hringja nú í tengslum við endurgreiðslu á flugmiðum með flugfélaginu WOW air, sem varð gjaldþrota í vikunni. Greint er frá þessu á vef Valitor.

„Valitor hefur fengið spurnir af því að hringt hafi verið í fólk í nafni Valitor og beðið um kortaupplýsingar, að sögn til að flýta fyrir endurkröfuferli,“ segir í tilkynningu á vefnum.

Tekið er skýrt fram að umræddir aðilar eru ekki á vegum Valitor en að öllum líkindum er um „sviksamlegt atferli“ að ræða. Þá ítrekar Valitor við korthafa sína að gefa ekki upp kortaupplýsingar sínar við óviðkomandi aðila sem óska eftir þeim í gegnum síma.