De Bruyne missir líklega af grannaslagnum

Pep Guardiola óttast að Kevin de Bruyne verði ekki tilbúinn til þess að mæta Manchester United í vikunni en hann fór meiddur af velli í sigri Manchester City á Tottenham í gær.

De Bruyne hefur nú þegar þurft að sitja hjá í vetur vegna tvennra hnémeiðsla. Í þetta skiptið eru það meiðsli aftan í læri sem virðast ótengd hnémeiðslunum.

„Ég talaði ekki við hann né læknana, en þetta eru vöðvameiðsli svo ég held hann missi af næsta leik,“ sagði Guardiola.

Manchester City er enn að elta Liverpool í baráttunni um Englandsmeistaratitilinn en City á þó leik til góða, sá leikur er viðureignin við Manchester United á miðvikudag.

Vinni City þann leik eru ríkjandi meistararnir komnir í bílstjórasætið fyrir síðustu þrjár umferðir deildarinnar.