Viggó skoraði þrjú og fagnaði sigri í fyrsta leiknum með Leipzig

Viggó Kristjánsson skoraði þrjú mörk þegar Leipzig vann dramatískan eins marks sigur á Füchse Berlin, 24-23, í 1. umferð þýsku úrvalsdeildarinnar í handbolta í dag. Öll þrjú mörk Seltirningsins komu af vítalínunni.

Þetta var fyrsti deildarleikur Viggós með Leipzig en hann gekk í raðir liðsins frá Westwien í Austurríki í sumar.

Berlínarrefirnir byrjuðu leikinn miklu betur, komust í 0-5 og voru fjórum mörkum yfir í hálfleik, 10-14.

Leipzig lék betur í seinni hálfleik en var samt þremur mörkum undir, 17-20, þegar tæpur stundarfjórðungur var til leiksloka.

Leipzig reyndist hins vegar sterkari á lokasprettinum og Lukas Krzikalla skoraði sigurmark liðsins þegar ein sekúnda var eftir. Lokatölur 24-23, Leipzig í vil.