Fjögurra marka sigrar hjá Hafnarfjarðarliðunum í Kaplakrika

FH og Haukar fara vel af stað á Hafnarfjarðarmótinu í handbolta sem fer fram í Kaplakrika.

FH vann fjögurra marka sigur á Val, 30-26, í seinni leik kvöldsins. Ásbjörn Friðriksson skoraði ellefu mörk fyrir FH sem var sex mörkum yfir í hálfleik, 17-11.

Þýski markvörðurinn Phil Döhler, sem FH fékk frá Magdeburg, sýndi góða takta í markinu og reyndist Valsmönnum erfiður ljár í þúfu.

FH skellir Valsmönnum, 30-26. Döhlerinn lofar góðu í búrinu hjá Fimleikafélaginu. #hfjmótiðpic.twitter.com/9qrxV79lWB

— Seinni bylgjan (@Seinnibylgjan) August 20, 2019

Þorgils Jón Svölu Baldursson skoraði sex mörk fyrir Val og Ýmir Örn Gíslason fimm.

Haukar báru sigurorð af Aftureldingu, 28-24, í fyrri leik kvöldsins. Mosfellingar voru marki yfir í hálfleik, 13-14.

Adam Haukur Baumruk, Atli Már Báruson og Darri Aronsson skoruðu fimm mörk hver fyrir Hauka. Guðmundur Árni Ólafsson og Þorsteinn Gauti Hjálmarsson voru báðir með sjö mörk í liði Aftureldingar.

Hafnarfjarðarmótið heldur áfram á fimmtudaginn. Þá mætast FH og Afturelding klukkan 18:00 og Haukar og Valur klukkan 20:00.