Sif Atla ekki í byrjunarliðinu í kvöld

Fanndís Friðriksdóttir, Svava Rós Guðmundsdóttir og Ásta Eir Árnadóttir koma allar inn í byrjunarlið Íslands fyrir leikinn í kvöld á móti Slóvakíu í undankeppni EM 2021.

Jón Þór Hauksson, landsliðsþjálfari kvenna í fótbolta, gerir þrjár breytingar á byrjunarliði íslenska kvennalandsliðsins frá því í sigurleiknum á móti Ungverjalandi samkvæmt heimildum Íþróttadeildar Vísis.

Þetta er annar leikur íslensku stelpnanna í undankeppni EM 2021 en sú keppni fer fram í Englandi. Ísland byrjaði vel með 4-1 sigri í fyrsta leik.

Inn í byrjunarliðið fyrir leikinn í kvöld koma þær Fanndís Friðriksdóttir og Svava Rós Guðmundsdóttir sem áttu báðar mjög góða innkomu í seinni hálfleik á móti Ungverjum. Þær taka stöðu þeirra Öglu Maríu Albertsdóttur og Hlínar Eiríksdóttur.

Jón Þór gerir líka breyting á vörninni því Ingibjörg Sigurðardóttir fer úr hægri bakverði og í miðvörðinn fyrir Sif Atladóttur. Blikinn Ásta Eir Árnadóttir kemur inn í byrjunarliðið og fer í hægri bakvörðinn.

Ásta Eir Árnadóttir er að fara spila sinn fyrsta keppnislandsleik en hún er ein af þeim sem spiluðu sína fyrstu landsleiki eftir að Jón Þór Hauksson tók við íslenska landsliðinu.

Miðjan heldur sér alveg óbreytt en þar spila áfram þær Gunnhildur Yrsa Jónsdóttir, Sara Björk Gunnarsdóttir og Dagný Brynjarsdóttir.

Jón Þór hefur talað um góða breidd í íslenska landsliðinu og sýnir það í verki með því að gera þrjár breytingar á sigurliði. Það er því mikil samkeppni um sætið í liðinu.

Byrjunarlið Íslands á móti Slóvakíu í kvöld samkvæmt heimildum Vísis:

Sandra Sigurðardóttir

Ásta Eir Árnadóttir

Ingibjörg Sigurðardóttir

Glódís Perla Viggósdóttir

Hallbera Guðný Gísladóttir

Gunnhildur Yrsa Jónsdóttir

Sara Björk Gunnarsdóttir

Dagný Brynjarsdóttir

Fanndís Friðriksdóttir

Elín Metta Jensen

Svava Rós Guðmundsdóttir