Olísdeildarspáin 2019/20: Íslandsmeistararnir búnir að missa bæði þjálfarann og besta leikmanninn

Handboltatímabilið 2019 til 2020 hefst eftir aðeins sex daga. Íþróttadeild Vísis og Stöðvar 2 Sports telur niður í Olís deildina í handbolta með því að birta spá okkar um lokastöðuna í deildinni. Olís deild karla hefst 8. september næstkomandi og nú er komið að áttunda liðinu í spá okkar.

Spá Vísis og Stöðvar 2 Sports fyrir Olís deild karla 2019-20:

1. sæti

2. sæti

3. sæti

4. sæti - (3. september)

5. sæti - Selfoss

6. sæti - Afturelding

7. sæti - Stjarnan

8. sæti - ÍR

9. sæti - KA

10. sæti - HK

11. sæti - Fram

12. sæti - Fjölnir

Íþróttadeild spáir því að Íslandsmeistarar Selfoss endi í fimmta sæti deildarinnar.

Selfyssingar enduðu í 2. sæti Olís-deildarinnar á síðasta tímabili en unnu átta af níu leikjum sínum í úrslitakeppninni. Selfoss tryggði sér fyrsta Íslandsmeistaratitilinn í sögu félagsins með stórsigri á Haukum, 35-25, á heimavelli. Áralangt uppbyggingarstarf bar þá loks ávöxt. Nánast allir leikmenn í Íslandsmeistaraliði Selfoss eru uppaldir hjá félaginu.

Selfoss missti þjálfara sinn, Patrek Jóhannesson, og besta leikmann deildarinnar, Elvar Örn Jónsson, til Skjern. Hannes Jón Jónsson var búinn að semja við Selfoss en hætti við. Þjálfaraleitin gekk illa og eftir að hafa talað við nánast alla þjálfara landsins og suma oftar en einu sinni réðu Selfyssingar Grím Hergeirsson sem hefur verið aðstoðarþjálfari liðsins undanfarin ár.

Skarð Elvars hefur ekki verið fyllt enda vaxa sambærilegir leikmenn ekki á trjánum. Þá sleit varnarmaðurinn öflugi, Sverrir Pálsson, krossband í hné og verður ekkert með í vetur.

Selfoss stefnir áfram hátt en það verður þrautinni þyngri að verja Íslandsmeistaratitilinn.



Komnir/Farnir:

Komnir:

Einar Baldvin Baldvinsson frá Val

Magnús Öder Einarsson frá Gróttu

Farnir:

Elvar Örn Jónsson til Skjern Håndbold

Pawel Kiepulski til Wybrzeze Gdansk

Sverrir Pálsson, sleit krossband

HBStatz tölurnar frá síðasta tímabili

Sóknarleikur Selfoss 2018/19 í tölum HBStatz

Mörk skoruð í leik - 1. sæti (28,6)

Skotnýting - 3. sæti (60,2%)

Vítanýting - 12. sæti (64,4%)

Hraðaupphlaupsmörk - 6. sæti (59)

Stoðsendingar í leik - 3. sæti (11,0)

Tapaðir boltar í leik - 3. sæti (8,0)

Vörn og markvarsla Selfoss 2018/19 í tölum HBStatz

Mörk fengin á sig í leik - 4. sæti (26,3)

Hlutfallsmarkvarsla - 9. sæti (30,1%)

Varin víti - 11. sæti (11)

Stolnir boltar - 1. sæti (90)

Varin skot í vörn - 8. sæti (43)

Lögleg stopp í leik - 1. sæti (22,2)

Líklegt byrjunarlið Selfoss í vetur

Markvörður - Einar Baldvin Baldvinsson - 22 ára

Vinstra horn - Hergeir Grímsson - 22 ára

Vinstri skytta - Haukur Þrastarson - 18 ára

Miðja - Nökkvi Dan Elliðason - 22 ára

Hægri skytta - Árni Steinn Steinþórsson - 28 ára

Hægra horn - Alexander Már Egan - 22 ára

Lína - Atli Ævar Ingólfsson - 31 árs

Varnarmaður - Tryggvi Þórisson - 17 ára

Fylgist með

Selfoss hefur framleitt handboltamenn á færibandi undanfarin ár. Tryggvi Þórisson (f. 2002) gæti orðið næstur til að stökkva fram á sjónarsviðið.

Tryggvi er hávaxinn línumaður sem gæti fengið hlutverk í vörn Selfoss eftir að Sverrir heltist úr lestinni.

Þjálfarinn

Grímur Hergeirsson hefur verið aðstoðarþjálfari Selfoss undanfarin ár en er núna við stýrið á skútunni. Þetta er hans fyrsta starf sem aðalþjálfari meistaraflokks. Þrátt fyrir að vera elsti þjálfari deildarinnar er Grímur sá reynsluminnsti þegar kemur að því að vera aðalþjálfari.

Grímur lék með Selfossi á árum áður og einnig í Noregi. Sonur hans, Hergeir, er fyrirliði Selfoss og bróður hans, Þóri, þekkja allir.





Hvað segir sérfræðingurinn?„Það er erfitt að dæma Selfoss af þessum leikjum sem ég hef séð með þeim á undirbúningstímabilinu. Það hefur vantað bæði Hauk og Árna Stein inn í liðið en maður sér að það eru ákveðnar áherslubreytingar með nýjum þjálfara. Þjálfarinn þarf að stíga í mjög stór sport nú þegar Patrekur (Jóhannesson) er farinn,“ segir Guðlaugur Arnarsson, sérfræðingur Stöðvar 2 Sports, um Selfoss-liðið.

„Það verður virkilega fróðlegt að sjá það hvernig þetta Selfosslið þróast í vetur. Ég reikna samt með með svolítið erfiðri byrjun hjá þeim,“ sagði Guðlaugur.

Hversu langt síðan að Selfoss ...

... varð Íslandsmeistari: 0 ár (2019)

... varð deildarmeistari: Aldrei

... varð meðal þriggja efstu í deildinni: 0 ár (2019)

... varð bikarmeistari: Aldrei

... komst í bikarúrslit: 26 ár (1993)

... komst í úrslitakeppni: 0 ár (2019)

... komst í undanúrslit: 0 ár (2019)

... komst í lokaúrslit: 0 ár (2019)

... féll úr deildinni: 8 ár (2011)

... kom upp í deildina: 3 ár (2016)

Gengi Selfoss í deildarkeppninni undanfarin átta tímabil:

2018-19  2. sæti í deildinni

2017-18  2. sæti í deildinni

2016-17  5. sæti í deildinni

2015-16  B-deild (3. sæti)

2014-15  B-deild (4. sæti)

2013-14  B-deild (3. sæti)

2012-13  B-deild (5. sæti)

2011-12  B-deild (4. sæti)

Gengi Selfoss í úrslitakeppninni undanfarin átta tímabil:

2018-19  Íslandsmeistari

2017-18  Undanúrslit

2016-17  Átta liða úrslit

2015-16  B-deild

2014-15  B-deild

2013-14  B-deild

2012-13  B-deild

2011-12  B-deild

Að lokum

Hvernig fylgir maður eftir fyrsta Íslandsmeistaratitlinum í sögu félagsins? Því fá Selfyssingar að svara í vetur. Hamra þeir járnið meðan það er heitt eða reynist bikarþynnkan sem erfið.

Elvar hefur verið besti leikmaður deildarinnar undanfarin tvö ár, frábær á báðum endum vallarins, og skarð hans er ekki hægt að fylla. Ekki hjálpar til að missa Sverri út. Selfyssingar eru því orðnir mjög þunnskipaðir í miðri vörninni. Varnarleikurinn er því talsvert stórt spurningarmerki fyrir tímabilið.

Selfoss býr svo vel að eiga einn efnilegasta leikmann heims, Hauk Þrastarson, í sínum röðum og hann fær enn meiri ábyrgð við brotthvarf Elvars og þarf að taka oftar af skarið. Nökkvi Dan Elliðason reyndist Selfossi gríðarlega mikilvægur í fyrra og hann verður í enn stærra hlutverki í vetur. Einar Sverrisson er væntanlegur eftir áramót og svo þurfa Selfyssingar að krossleggja fingur og vonast til að öxlin á Árna Steini Steinþórssyni haldi.

Selfyssingar verða góðir í vetur en verða þeir nógu góðir til að berjast um titla?