Fagna sjö­tíu ára kommún­ista­­stjórn í dag

Yfirvöld í Kína minnast þess í dag að sjötíu ár eru liðin frá því kommúnistar komust til valda í landinu og er mikið um dýrðir í höfuðborginni Beijing í dag vegna þess.

Her landsins sýnir tæki sín og tól og farið er yfir sögu landsins frá tímum Maó og til vorra daga, en í dag er Kína eitt öflugasta veldi heims en um leið oft gagnrýnt fyrir mannréttindabrot á eigin þegnum og útþennslustefnu sína, ekki síst á Suður-Kínahafi.

Öllum herlegheitunum er sjónvarpað beint til landsmanna og í tilefni dagsins ákvað ríkisstjórnin að gefa fátækustu þegnum landsins sjónvarpstæki til að þau gætu orðið vitni að sjónarspilinu. 620 þúsund flatskjám var því dreift til borgaranna á dögunum.

Mótmælin í Hong Kong skyggja þó á hátíðarhöldin en búist er við að mótmælendur í borginni, sem eru andsnúnir ofríki Kínverja, láti til skarar skríða í dag.