Eyjamenn náðu í stig á siðustu stundu

ÍBV og Fram skildu jöfn í Olís-deild karla í handbolta í dag þegar liðin áttust við í Vestmannaeyjum í dag.

Nokkuð jafnræði var með liðunum stóran hluta leiksins þó gestirnir úr Safamýrinni hafi haft frumkvæðið lengstum. 

Framarar leiddu með tveimur mörkum í leikhléi, 11-13 og voru tveimur mörkum yfir, 21-23, þegar ein mínúta lifði leiks.

Gestirnir fóru hins vegar illa að ráði sínu á lokakaflanum á meðan Friðrik Hólm Jónsson gerði síðustu tvö mörk leiksins og tryggði heimamönnum þar með eitt stig. Lokatölur 23-23. 

Kristján Örn Kristjánsson var markahæstur Eyjamanna með 5 mörk en Kristinn Hrannar Bjarkason markahæstur hjá Fram, einnig með 5 mörk.