Bein útsending: Plötusnúðar spila á meðan Perlan snýst í hringi

Viðburðafyrirtækið Volume hefur tekið höndum saman með Perlunni og streymir tónlist plötusnúða þrjú kvöld í röð um páskahelgina.

Í kvöld er komið að plötusnúðnum Benna og ætlar hann að koma sér fyrir undir glerhjúpnum á Perlunni spila fyrir dansþyrsta á meðan gólfið hringsnýst og borgin nýtur sín fyrir utan. Fjörið í galtómri Perlunni hefst klukkan 22 og stendur til klukkan 23.30.

Hægt verður að horfa á útsendinguna í spilara hér fyrir neðan.

Plötusnúðurinn Benni er einnig í tvíeykinu Mogesen og hefur síðasta áratug þeytt skífum á hinum ýmsu stöðum í Reykjavík og fundið sér sess innan hústónlistarsenunnar. Hann sækir innblástur úr klassísku diskó og funktónlist.

Viðburðafyrirtækið Volume einbeitir sér að upplifun þar sem fólk kemur saman í gegnum tónlist. Vegna veirufaralds og samkomubanns er áhersla fyrirtækisins nú á beinar útsendingar þar sem plötusnúðar þeyta skífum sínum á ýmsum framandi stöðum.

Volume tileinkar útsendingar helgarinnar þeim starfsmönnum sem eru í víglínunni á hverjum degi og er fólk hvatt til að fara á vef Landspítalans láta fé af hendi rakna til Styrktarsjóðs bráðasviðs.