Flóð talin hafa kostað fimmtán lífið í Japan

Óttast er að fimmtán séu látnir á japönsku eyjunni Kyushu eftir miklar rigningar og flóð sem valdið hafa aurskriðum og miklu tjóni.

Fjórtán eru látnir á hjúkrunarheimili á eyjunni og talið er að einn hafi orðið fyrir aurskriðu. Níu annarra er saknað.

Japönsk yfirvöld hafa skipað yfir 200.000 íbúum Kyushu að yfirgefa heimili sín vegna flóðanna en áin Kuma hefur flætt vel yfir bakka sína.

Shinzo Abe, forsætisráðherra Japan, hefur sent herlið, skipað tíu þúsund hermönnum á svæðið til að sinna björgunarstörfum vegna flóðanna.

Enn er búist við áframhaldandi rigningu og segja yfirvöld að fólk þurfi enn að vera á varðbergi.