Ást er að fara í sund með makanum þrátt fyrir að þú hatir það

Makamál fengu Egill Ploder, einn þriggja þáttastjórnanda Brennslunar á FM957, til að svara nokkrum vel völdum spurningum tengdum ástinni. Þegar Makamál spurðu hvernig hann vilji láta titla sig í viðtalinu er aldeilis ekki skortur á svörum.

Ég er þáttastjórnandi í Brennslunni á FM957, þáttastjórnandi samfélagsmiðlaþáttarins Burning Questions, markaðsmaður, leikari, ástríðukokkur, semi atvinnumaður í handbolta, byrjandi í golfi, fótboltamaður sem hefði getað náð lengra að eigin mati, amatör rafíþróttamaður og einhverskonar tónlistarmaður.

Hvorki meira né minna. Egill er í sambandi með Thelmu Gunnarsdóttur og eru þau búin að vera saman í sjö ár. Heyrum hvað Egill hefur að segja um ástina og rómantík. 

Uppáhalds rómantíska kvikmyndin mín er: Klassískt svar en alvöru ræma! - The Notebook.

Fyrsti kossinn: Var á bar í miðbæ Reykjavíkur. Margir góðir hlutir sem geta gerst þar!

Uppáhalds ástarsorgar power ballaðan mín er:  Home með Michael Bublé. Ekki beint ástarsorgar power-ballaða. Sorry. Bara innilega gott ástarlag.

Lagið „okkar“ er: Lagið 18 með One Direction. Þegar við byrjuðum saman var Thelma ekki mikill aðdáandi þessarar mögnuðu hljómsveitar. Það tók svo sem ekki langan tíma að ná henni yfir á vagninn og við höfum sungið saman með þessu lagi í 7 ár.

Mér finnst rómantískt stefnumót vera: Þarna kemur mjúki Ploder vel inn, jafnvel einfaldi Ploder líka. Ég myndi elda eitthvað rosalegt heima. Kveikja á kertum og horfa á góða kvikmynd. Stoppað í miðjunni fyrir rauðvín og osta.

Uppáhaldsmaturinn minn: Einfalt. Alvöru schnitzel að hætti Jóhönnu Ploder, með miklu grænolíusalati og kartöflum. Dýfum í kollara.

Fyrsta gjöfinni sem ég gaf kærustunni minni: Ég held alveg örugglega að fyrsta gjöfin sem ég gaf henni hafi verið hálsmen með nafninu hennar. Fáranlega rómantískt! Hún er reyndar búinn að týna því. Það er eins og það er.

Fyrsta gjöfin sem kærastan mín gaf mér: Svartir Converse skór. Fáranlega rómantískt!

Ég elska að: Gera það sem ég geri á hverjum degi.

Kærastan mín er: Metnaðarfull, ákveðin, skemmtileg og sæt.

Rómantískasti staður á landinu er: Heimilið mitt í Bryggjuhverfinu í Grafarvogi!

Ást er: Að fara í sund með makanum þrátt fyrir að þú hatir það.