Elvar Örn: Ég er klár og engar afsakanir

Leikstjórnandi íslenska liðsins, Elvar Örn Jónsson, hefur jafnað sig af meiðslum og verður í liðinu gegn Dönum í kvöld.

„Ég var 100 prósent í gær og það gekk vel. Ég er klár og engar afsakanir núna,“ sagði Elvar Örn fyrir æfingu íslenska liðsins í gær í Malmö Arena en þar verður einmitt leikið í kvöld.

„Mér líður mjög vel og gríðarlega spenntur að spila hérna. Það verður geggjað. Þetta er aðeins stærra en Hleðsluhöllin og vonandi verður stemningin eins góð.“

Það er mikil tilhlökkun hjá strákunum að fá að glíma við heimsmeistarana í fyrsta leik.

„Þetta verður frábært. Alvöru leikur og allir leikir í þessum riðli eru alvöru. Við þurfum að eiga stjörnuleik til þess að geta unnið þá. Við mætum kolklikkaðir í byrjun leiks.“