Sótt­varn­a­mið­stöð vegn­a Wu­han-veir­unn­ar hér­lend­is yrði al­gjört neyð­ar­úr­ræð­i

Rauði krossinn og heilbrigðisyfirvöld leita nú að húsnæði sem hægt yrði að nýta sem sóttvarnamiðstöð hérlendis, verði talin þörf á slíkri stöð vegna Wuhan-veirunnar. Sóttvarnalæknir segir ekkert fast í hendi með staðsetningu slíkrar stöðvar. Fulltrúi Rauða krossins ítrekar að slík stöð yrði algjört neyðarúrræði.

Þórólfur Guðnason sóttvarnarlæknir staðfestir þetta í samtali við Vísi. Hann segir að leitin beinist að húsnæði sem gæti nýst ef til þess kæmi að fólk þyrfti að fara í einangrun eða sóttkví.

„Það er bara verið að skoða ýmsa möguleika. Það er ekkert fast í hendi með það hvað myndi henta best og staðsetningin á því. Svo þarf auðvitað að vera þjónusta í kring um það líka, við það fólk sem þar er.“

Þórólfur nefndi þó enga ákveðna staðsetningu og segir að almenn leit standi yfir.

„Það er bara verið að skoða ýmsa kosti. Þetta kemur bara í ljós þegar menn eru búnir að komast að niðurstöðu.“

Hann segir heilbrigðisyfirvöld vinni nú eins hratt og kostur er á við að festa hendur á hentugt húsnæði.

Algjört neyðarúrræði

Brynhildur Bolladóttir, upplýsingafulltrúi Rauða krossins, segir að komi til þess að sóttvaramiðstöð yrði sett upp, yrði slíkt algjört neyðarúrræði. Engin þörf sé á slíkri stöð hérlendis, eins og staðan er í dag.

„Þetta er allt á fyrstu stigum. Ég veit að það hefur verið rætt að þetta yrði nálægt flugvellinum,“ segir Brynhildur í samtali við fréttastofu, og á þar við Keflavíkurflugvöll.

Hún segir að líkur megi leiða að því að þeir sem gætu þurft að nýta sér sóttvarnamiðstöð væru erlendir ferðamenn og því væri heppilegt að hafa stöðina nálægt eina alþjóðaflugvelli landsins.

„Þetta húsnæði sem verið er að skoða. Þetta er algjört neyðarúrræði. Við viljum ekki skelfa fólk, en við viljum vera tilbúin. Heilbrigðisyfirvöld eru að skoða allt hjá sér, hvar væri hægt að koma sjúklingum fyrir og annað slíkt.

Hátt í átta þúsund staðfest smit

Wuhan-veiran er ný tegund kórónaveiru og ber formlega heitið 2019-nCoV. Hún er talin eiga uppruna sinn í borginni Wuhan í Kína. Minnst 170 eru látin vegna veirunnar, en þar af eru flestir í Hubei-héraði í Kína, þar sem Wuhan er.

Þá sýna nýjustu tölur yfir staðfest smit að 7711 hafi greinst með veiruna. Veiran hefur breiðst um allt meginland Kína og til alls sextán landa, svo staðfest sé.

Undanfarið hafa ríkisstjórnir heims og stórfyrirtæki gripið til aðgerða til að koma í veg fyrir frekari útbreiðslu veirunnar. Þannig hafa stjórnvöld í Hong Kong lokað fyrir lesta- og ferjusamgöngur til meginlands Kína. Eins hefur Rússland lokað landamærum sínum að Kína.

Einnig hefur verið greint frá því að húsgagnaverslunarkeðjan IKEA hafi lokað öllum verslunum sínum á meginlandi Kína. Stór alþjóðleg flugfélög á borð við British Airways og SAS hafa þá aflýst öllum flugferðum sínum til og frá Kína.