Tveir hand­teknir grunaðir um að hafa nauðgað og myrt þrettán ára stúlku

Tveir menn hafa verið handteknir á Indlandi, grunaðir um að hafa nauðgað og myrt 13 ára gamla stúlku á föstudag. Lík hennar fannst á sykurakri í norðurhluta Uttar Pradesh héraði. Mennirnir sem voru handteknir voru nágrannar stúlkunnar.

Faðir stúlkunnar hefur haldið því fram að augu stúlkunnar hafi verið skorin úr henni og tungan sömuleiðis en lögregla neitar því alfarið. Fjölskylda stúlkunnar fann lík hennar en þau höfðu farið að leita hennar þegar hún kom ekki aftur eftir að hafa tekið sér pásu til að fara á salernið. Fjölskyldan segir að lík hennar hafi verið afskræmt þegar það fannst

Lögreglan hefur gefið það út að stúkan hafi dáið eftir að hafa verið kyrkt í kjölfar þess að henni var nauðgað en að augu hennar og tunga hafi ekki verið skorin úr. „Það voru rispur nærri augum hennar, líklega vegna beittra sykurreyrslaufanna sem voru allt um kring,“ sagði Satendra Kumar, talsmaður lögreglunnar.

Krafa um að lögum verði breytt

Kynferðisofbeldi gegn konum hefur verið í kastljósinu á Indlandi undanfarin ár eftir að ungri stúlku var nauðgað og hún myrt í strætisvagni í Delhi, höfuðborg landsins. Morðið leiddi til mikilla mótmæla og krafan um að lögum um nauðgun yrði breytt en þeirri kröfu hefur ekki verið mætt.

Samkvæmt nýjum tölum um glæpi er fjórða hvert nauðgunarfórnarlamb á Indlandi barn og í meirihluta slíkra brota er afbrotamaðurinn einhver sem fórnarlambið þekkir.

Fyrir aðeins nokkrum mánuðum var sex ára gamalli stúlku rænt fyrir utan heimili hennar og henni nauðgað. Árásarmaðurinn gerði tilraun til að blinda stúlkuna og er talið að það hafi verið til þess að koma í veg fyrir að hún gæti borið kennsl á hann.

Þá var 25 ára gamall maður handtekinn í febrúar vegna gruns um að hann hafi nauðgað fimm ára gamalli stúlku á lóð bandaríska sendiráðsins í Delhi.