Staðan að skána í Kína

Stjórnvöldum í Kína virðist takast vel að hefta útbreiðslu nýju kórónuveirunnar. Læknir hjá Alþjóðaheilbrigðismálastofnuninni sagði hægt að læra af hörðum og snöggum viðbrögð Kínverja.

Það sem af er marsmánuði hefur tilfellum í Kína fjölgað um níu hundruð samanborið við rúmlega tuttugu og tvö þúsund utan landsins. Svo gott sem engin fjölgun hefur verið í Kína undanfarna þrjá daga.

Alls hafa meira en 110.000 tilfelli greinst á heimsvísu, þar af rúmlega 80.000 í Kína. Stór hluti Kínverja hefur nú náð bata, 3.120 hið minnsta látið lífið og eru sjúklingar því nú 18.904 talsins.

Engin tilfelli greindust um helgina utan Hubei-héraðs, þar sem veiran á upptök sín. „Engin ný tilfelli greindust innan Hubei-héraðs, nema í borginni Wuhan þar sem fjöldi nýrra tilfella hefur verið undir fimmtíu síðustu tvo daga. Núna þurfum við að einbeita okkur svo ástandið versni ekki aftur,“ sagði Mi Feng, upplýsingafulltrúi heilbrigðisráðs Kína.

Læknir hjá Alþjóðaheilbrigðismálastofnuninni, sagði við New York Times að hörð viðbrögð Kínverja, sum sé samkomu- og samgöngubann og strangar reglur um sóttkví, hafi virkað sem og það að íbúar voru skyldaðir í sýnatökur.