Óskar um ósætti í æfingaferð: Fúlir yfir einhverri vinstri-grænni forsjárhyggju

Óskar Hrafn Þorvaldsson stýrir Breiðabliki gegn sínu gamla liði Gróttu í næsta mánuði þegar 1. umferð Pepsi Max-deildarinnar fer fram. Hann ræddi um vistaskipti sín og margt fleira í hlaðvarpsþættinum Fantasy Gandalf.

Hægt er að hlusta á þáttinn í heild hér að neðan. Þar ræðir Óskar meðal annars um leikmannamál Breiðabliks, þá ákvörðun að Gunnleifur Gunnleifsson verði varamarkvörður og aðstoðarþjálfari, og meinta óánægju leikmanna í æfingaferð Blika í Svíþjóð á dögunum.

„Í grunninn held ég að þetta hafi verið blásið upp,“ segir Óskar um ósætti í æfingaferðinni, en fram kom í þættinum Dr. Football á dögunum að einhverjir leikmanna Breiðabliks hefðu verið ósáttir við að Óskar færi til Danmerkur að hitta fjölskyldu sína eftir ferðina. Ósættið mun einnig hafa stafað af því hvaða reglur Óskar setti um það hve lengi menn mættu vera úti að skemmta sér lokakvöld ferðarinnar:

„Ég held að að einhverju leyti hafi þetta verið tekið úr samhengi. Ég held að leikmenn hafi ekki haft neina sérstaka skoðun á því hvort ég fór eða ekki. Einhverjir vildu fá að vera lengur en til 1 úti að skemmta sér, fá rýmra svigrúm til að vera fullorðnir og sjálfstæðir. Að þeir gætu sjálfir tekið ákvörðun um það hvenær væri hollt fyrir þá að fara heim. Ég held að þetta hafi nú ekki rist djúpt, ég hef ekki upplifað það,“ segir Óskar og aðspurður hvort leikmenn hefðu virkilega haft eitthvað út á það að setja að hann heimsækti fjölskyldu sína á leiðinni heim svaraði hann: 

„Ég held að ef þú myndir spyrja alla leikmenn Breiðabliks þá myndu þeir segja að þetta hefði bara verið flott. En akkúrat þarna þá voru menn fúlir yfir því að það væri einhver vinstri-græn forsjárhyggja, að setja útivistartíma. Það endaði einhvern veginn svona.“

Svakalegur munur að þurfa ekki að nota næturnar í undirbúningSonur Óskars, Orri Steinn, fór frá Gróttu til FC Köbenhavn í vetur og því er fjölskylda þjálfarans nú búsett í Danmörku. Á meðan eyðir Óskar nánast öllum stundum á sínum nýja vinnustað en svona lýsir hann hefðbundnum degi:

„Ég vakna örugglega klukkan sex eða eitthvað og er kominn á Kópavogsvöll klukkan átta. Síðan er ég þar til sjö á kvöldin. Ef að það eru leikir einhvers staðar þá kannski reyni ég að ná þeim. Svo er ég kominn heim svona átta, hálfníu, stundum seinna en sjaldan fyrr,“ segir Óskar, og tekur undir að það sé verulega gott að þurfa ekki lengur að sinna öðru starfi samhliða þjálfuninni:

„Ég var að vinna seinna árið mitt með Gróttu. Fyrra árið hafði ég rýmri tíma, og var með eigið fyrirtæki og eitthvað. En jú, það er rosalegur munur að þurfa ekki að nota næturnar í að undirbúa sig, horfa á leiki og klippa, og hugsa einhvern veginn um æfingar og taktík. Það er svakalegur munur.“

Eftir að Óskar tók við Breiðabliki var nokkuð hávær umræða um að ráðningin hefði verið löngu ákveðin, á miðju sumri og löngu áður en Ágústi Gylfasyni var sagt upp hjá félaginu. Óskar segir umræðuna hafa verið undarlega:

„Hún var mjög sérstök. Ég held að allir þeir sem ástundi svona ábyrga stjórnun, ef þeir hafa á einhverjum tímapunkti í hyggju að breyta til, og eru búnir að koma auga á einhverja einstaklinga sem að þeir gætu hugsað sér að ráða í starf, þá muni þeir á einhverjum tímapunkti athuga hvort að sá hinn sami hafi áhuga á starfinu. Þá í gegnum einhverja aðila eða slíkt,“ segir Óskar.

„Ég hef sagt það áður að fyrstu samskiptin sem ég átti við Breiðabik voru eftir að Pepsi-deildinni lauk. Ég var náttúrulega spurður út í þetta svo að ég vissi svo sem að það væri verið að ræða um þetta, en á engum tímapunkti hafði ég heyrt í einum einasta manni frá Breiðabliki. Ég get ekki sagt annað en að það bauð mér enginn vinnu og það spurði mig enginn hjá Breiðabliki hvort að ég hefði áhuga á að taka við Breiðabliki, á meðan að Gústi Gylfa var í starfi,“ segir Óskar, en hann segir það hafa verið mjög erfiða ákvörðun að segja skilið við Gróttu.