Vodafonedeildin fer aftur af stað

Þann fyrsta september klukkan 19:15 hefst Vodafone deildin aftur í CS:GO þar sem átta bestu lið landsins etja kappi í Counter Strike : Global Offensive. 

Útsendingar verða á hverjum þriðjudegi og fimmtudegi með þrem viðureignum á hverju kvöldi. Deildin mun spanna 14 umferðir spilaðar á sjö vikum og mun henni verða sjónvarpað beint á Stöð 2 eSport. 

Þó nokkuð hefur verið hrist upp í liðunum og munum við fjalla betur um það á næstu dögum. En einnig hefur fyrirkomulagi deildarinnar verið gjörbreytt. 

Hver viðureign verður nú einungis eitt kort og hefur mótastjórn kynnt fyrirkomulag þar sem liðið sem spilar á heimavelli nýtur góðs af því. Þetta er leið sem hefur ekki verið farin áður í erlendu senunni né hér heima, en til að útskýra hana þá fengum við Halldór Már Kristmundsson sérfræðing í Vodafone deildinni.

,,Venjulega eru 7 kort í boði sem er keppt í og hefðbundið kerfi er að lið skiptast á að banna kort þangað til eitt eða þrjú kort eru eftir, fer eftir því hvort keppt er í bestur af þrem eða einu [bo3/bo1]. Þetta fyrirkomulag þýðir að lið hefur ekki þurft að vera gott í öllum kortunum, því þeir geta neitað kortum sem þeir jafnvel æfa ekki. En nú hefur mótastjórn ákveðið að ögra jafnvæginu og gefa liðinu sem á heimaleik talsvert mikið vald. Kerfið sem verður spilað eftir á þessu tímabili er þannig að gestirnir fá að banna eitt kort og svo velur liðið sem á heimavöllinn kort af þeim sex sem eru eftir. Þetta gefur heimaliðinu tækifæri til að draga gestina í kort sem þeir undir öðrum kringumstæðum myndu sjaldan spila og þar með búið til heimavallar forskot. Svo það mun þýða heilan helling hvort Fylkir mætir KR á útivelli eða heima. Ég er mjög spenntur að sjá útkomuna í þessu nýja kerfi. Þetta er ung keppnisgrein sem er enn í þróun.”

Áhugavert mun vera að fylgjast með hvort breytingin hafi áhrif á undirbúning liða og jafn vel útkomu leikja.

Spilaðar verða tvær umferðir í hverri viku á þriðjudögum og fimmtudögum. Verður leikjunum sjónvarpað beint á Stöð 2 eSport þar sem fyrsti leikurinn hefst kl 19:30. 

Ljóst er að um hörkuspennandi viðureignir er að ræða þar sem mikið er í húfi í hverjum leik.

Vodafonedeildin í CS:GO verður skipuð eftirfarandi liðum og leikmönnum.

KR: ofvirkur, kruzer, Thomsen, Miðgarðsormur og Hundzi

Þór: snky, ADHD, Rean, aNdrehh, Zolo og BDSM

Hafið: dell1, allee, clvr, Tony, b0ndi,  peter og s7ckoNe sem varamenn

XY esport: TripleG, kyro, xeri, Sveittur, brnr og bellamy sem varamaður

Fylkir: lelillz, MonteLiciouz, vrz, Furious og skipið

Exile: Jolli, Rec0, Múfasa, Zerq, Yumikoi og Dúddi

Dusty: EddezeNNN, Bjarni, thorsteinnf, StebbiC0C0, fluff og RoNiN sem varamaður

GOAT: Eiki47, vikki, snær, Hugo og DOM

Fylgstu með á vísir.is til að kynnast liðunum betur á næstu dögum.