Haukarnir fóru illa með lið gamla þjálfara síns í gær

Haukar hafa unnið tvo fyrstu leiki sína á Hafnarfjarðarmótinu í handbolta eftir stórsigur í gærkvöldi. FH-ingar höfðu áður unnið sinn fyrsta sigur á mótinu.

FH vann tveggja marka sigur á Stjörnunni, 27-25, í fyrri leik kvöldsins eftir að Stjörnumenn voru tveimur mörkum yfir í hálfleik, 15-13. FH-liðið tapaði fyrsta leiknum sínum en þessi sigur þýðir að liðið fær úrslitaleik um titilinn á móti Haukum.

Ásbjörn Friðriksson var markahæstur hjá FH-liðinu með sex mörk og Jakob Martein Ásgeirsson skoraði fimm mörk. Dagur Gautason skoraði sex mörk fyrir Stjörnuna og Goði Ingvar Sveinsson var með fimm mörk en besti maður liðsins var Adam Thorstensen í markinu með fimmtán varin skot.

Haukarnir unnu síðan sautján marka sigur á Aftureldingu í seinni leik kvöldsins, 34-17, eftir að hafa verið níu mörk yfir í hálfleik, 20-11.

Haukar unnu Aftureldingu í úrslitaleik Ragnarsmótsins á Selfossi um síðustu helgi en það var mun jafnari leikur.

Mosfellingar réðu að þessu sinni ekkert við Haukaliðið sem er að spila vel á undirbúningstímabilinu. Gunnar Magnússon hætti að þjálfa Haukaliðið í vor og tók við Aftureldingu. Hann fann engin svör við leik sinna gömlu lærisveinar í gærkvöldi.

Orri Freyr Þorkelsson skoraði sex mörk fyrir Hauka, Ólafur Ægir Ólafsson var með fimm mörk og Geir Guðmundsson skoraði fjögur mörk. Andri Sigmarsson Scheving varði líka vel í markinu og alls fimmtán skot. Þorsteinn Leó Gunnarsson var markahæstur hjá Aftureldingu með sjö mörk.

Lokaleikir mótsins fara svo fram á laugardag þar sem Afturelding og Stjarnan mætast klukkan 13.30 og mótinu lýkur svo á Hafnarfjarðarslag Hauka og FH klukkan 16.15. Báðir leikir eru í beinni útsendingu á HaukarTV en hér fyrir neðan má horfa á leikina frá því í gær.