Segja að Foden og Greenwood hafi einnig tekið fullt af myndum

Lára Clausen og Nadía Sif Líndal eru umtöluðustu manneskjur Íslands, eftir að hafa hitt ensku landsliðsmennina Mason Greenwood og Phil Foden upp á hótelherbergi á Hótel Sögu. Málið rataði á forsíður allra helstu fjölmiðla Bretlands á mánudaginn síðasta. Síðan þá hafa þær báðar komið fram í einkaviðtölum við The Sun og Daily Mail og fengi gríðarlega mikla athygli.

Lára og Nadía ræddu við Sölva Tryggvason á dögunum í hlaðvarpsþætti hans. Þar kemur meðal annars fram að það þær eru vissar um að það hafi verið sjálfur Gareth Southgate, landsliðsþjálfari Englendinga, sem hafi rutt sér leið inn í hótelherbergið og öskrað á þær „hvar eru strákarnir?, hvar eru strákarnir.“

„Ég er inni á svona stefnumótaforriti sem er fyrir frægt fólk. Einhvern veginn komst ég í gegnum ferlið að komast inn á þetta forrit. Ég fæ match við Mason Greenwood og hann byrjar að senda mér og segist vera á Íslandi. Ég sé svo að hann var að keppa á móti Íslandi. Við ákváðum síðan að hittast og það tók mig alveg langan tíma að samþykkja það,“ segir Nadía Sif.

Hún segir að vinir hennar hafi sagt að þetta væri bara tækifæri sem kæmi einu sinni á lífsleiðinni.

„Ég hugsaði bara, ég er ung, af hverju ekki? Hann segir við mig að öryggisgæslan á hótelinu sé mjög ströng og hann geti ekki farið út af hótelinu. Það sem ég gæti gert væri að panta mér herbergi og hann geti svo komið á það herbergi og við slakað á saman,“ segir Nadía sem gerði einmitt það. Þegar hún var mætt á staðin var Phil Foden einnig á svæðinu og þannig dróst Lára Clausen inn í málið. Þarna var hún stödd í Hagkaup í Garðabæ. Það var nokkuð flókið mál að komast inn á hótelið og þurftu þær báðar að bóka sér herbergi sem landsliðsmennirnir ætluðu síðan að endurgreiða þeim fyrir. Sú greiðsla hefur ekki enn borist.

Stelpurnar hafa verið gagnrýndar fyrir að birta myndir af þeim á samfélagsmiðlum og rataði til að mynda eitt skjáskot af Phil Foden með nærbuxurnar hálfniður rassinn í alla fjölmiðla í Bretlandi.

„Málið er að þeir voru að taka myndir og myndbönd af okkur allt kvöldið og því héldum við að það væri kannski allt í góðu,“ segir Nadía.

„Ég sá eitt myndband sem Mason tók af mér og Phil en ég veit ekkert hvert það fór. Bara Phil að knúsa mig og kyssa mig á kinnina. Það á kannski ekki allt heima á netinu en við vorum bara í einhverju galsa og vissum ekki hversu frægir þeir voru. Vinir okkar voru að fríka út og vildu auðvitað fá Snap af þeim. Svo ég setti þetta í story fyrir nánustu vini mína, fyrst allir vildi sjá þá,“ segir Lára. Þær segja báðar að leikmennirnir hafi aldrei sagt eitt einasta orð um það að leggja símana til hliðar og vera ekki að taka þá upp.

Phil Foden á kærustu og 2 ára gamalt barn. Þetta hafði Lára ekki hugmynd um.

„Hann nefndi ekki einu sinni að hann ætti barn eða kærustu,“ segir Lára.

Leikmennirnir voru með þeim í um fjórar klukkustundir. Síðan fara þeir í sín herbergi og Lára og Nadía gista saman í herbergi. Þær náðu ekki að sofa lengi og eins og áður segir var bankað mjög harkalega á hótelhurðina.

„Ég fer til dyra og þar stendur Southgate sem ég vissi ekkert hver væri fyrr en ég google-aði hann. Þeir voru alveg í æfingabúningnum, einhverjum svona bláum. Síðan er einhver annar kall og kona sem vinnur hjá Securitas. Þau rjúka inn og spyrja okkur hvar strákarnir séu,“ segir Nadía.

Í viðtalinu ræða þeir einnig um þau viðtöl sem þær fóru í við The Sun og Daily Mail og að þær hafi ekki fengið eina krónu í greiðslu frá þeim miðlum en hér að neðan má sjá viðtalið í heild sinni.