Líklegt að frost mælist víða næstu nótt

Sunna Kristín Hilmarsdóttir skrifar 24. september 2020 07:16

Hitaspá Veðurstofu Íslands fyrir næstu nótt sýnir ansi mikinn kulda víða um land. Veðurstofa Íslands

Nokkuð hefur snjóað til fjalla á norðanverðu landinu í nótt þótt úrkoman hafi verið rigning eða slydda víðast hvar á láglendi.

Í dag verður norðan strekkingur og áframhaldandi éljagangur norðan heiða en yfirleitt léttskýjað sunnan- og vestanlands, að því er segir í hugleiðingum veðurfræðings á vef Veðurstofu Íslands.

Er líður á daginn mun draga úr ofankomu og vindi og í kvöld verður orðið bjart að mestu á öllu landinu. Hægum vindi og björtum nóttum fylgir hins vegar kólnun og er því líklegt að frost mælist víða næstu nótt.

Snjórinn mun svo ekki stoppa lengi við í þetta skipti því á morgun er vaxandi suðaustanátt er skil frá næstu lægð nálgast landið úr suðvestri. Með þessum skilum þykknar og hlýnar á ný. Fram í miðja næstu viku ráða svo suðlægar áttir ríkjum með vætu af og til.

Veðurhorfur á landinu:

Norðan 10-15 m/s en heldur hvassara í vindstrengjum suðaustantil. Él norðanlands, en yfirleitt léttskýjað á Suður- og Vesturlandi. Hiti 0 til 7 stig. Lægir í kvöld, léttir til og frystir víða um land í nótt.

Breytileg átt, 5-10 m/s og að mestu bjartviðri, en skýjað með köflum norðaustanlands og stöku skúr á Suðausturlandi.

Vaxandi suðaustanátt eftir hádegi, 10-18 á Suður- og Vesturlandi annað kvöld. Þykknar upp með sunnan- og vestantil seinnipartinn og fer að rigna vestast seint annað kvöld. Hiti í kringum frostmark í fyrramálið, en hlýnandi sunnan- og vestanlands upp úr hádegi.

Á föstudag:

Hæg breytileg átt og víða bjartviðri. Hiti 2 til 7 stig, en kringum frostmark norðaustantil. Gengur í suðaustan 10-15 m/s og fer að rigna sunnan- og vestanlands um kvöldið.

Á laugardag:

Suðlæg átt, 10-18 m/s. Víða rigning, en þurrt að mestu um landið norðaustanvert. Hiti 4 til 11 stig, hlýjast norðaustanlands.

Á sunnudag:

Sunnanátt og rigning austantil á landinu, en hægari vindur og stöku skúrir á vesturhelmingi landsins. Hiti 4 til 11 stig, svalast á Vestfjörðum.

Á mánudag:

Fremur hæg suðlæg átt og skúrir sunnan- og vestanlands, annars bjart með köflum og þurrt. Hiti 2 til 8 stig, hlýjast syðst.

Veður