Kári fékk nýjan kött að gjöf

Kári Stefánsson og Valgerður Ólafsdóttir fengu kettling að gjöf um helgina. Sólveig dóttir Kára segir köttinn gleðja fólkið sitt óendanlega mikið þótt hann muni aldrei koma í stað þess sem kvaddi þennan heim á föstudaginn.

Kári lýsti eftir Hugin á föstudaginn, félaga sínum og fóstbróður eins og Kári komst að orði. Síðar um daginn greindi hann frá því að leitinni væri lokið.

„Huginn fannst andvana í garði ekki langt frá heimili sínu. Dánarorsök óþekkt. Djúpvitur köttur, fagur og yndislegur horfinn á vit feðra sinna. Við sitjum eftir í botnlausri sorginni.“

Sólveig Káradóttir, dóttir Kára, greinir frá því á Instagram að Kári og Valgerður hafi fengið kött að gjöf um helgina. Tónlistarkonan Þórunn Antonía gaf parinu köttinn.

„Takk elsku Þórunn fyrir að gleðja fólkið mitt óendanlega mikið,“ skrifar Sólveig á Instagram.