For­stjóri Al­þjóða­heil­brigðis­stofnunarinnar í sótt­kví

Tedros Adhanom Ghebreyesus, forstjóri Alþjóðaheilbrigðisstofnunarinnar (WHO), er kominn í sóttkví eftir að manneskja sem hann var í samskiptum við greindist með kórónuveiruna.

Ghebreyesus greindi frá þessu á Twitter-síðu sinni seint í gærkvöldi og lagði áherslu á að hann væri ekki með nein einkenni Covid-19. Ghebreyesus býr í Genf í Sviss þar sem höfuðstöðvar WHO eru.

„Mér líður vel og er án einkenna en ég verð í sóttkví næstu daga, líkt og verkferlar WHO kveða á um, og mun vinna heima,“ sagði Ghebreyesus á Twitter.

Þá lagði hann áherslu á að mikilvægi þess að allir fylgdu leiðbeiningum heilbrigðisyfirvalda þegar kæmi að faraldrinum.

„Þannig brjótum við smitkeðjurnar, bælum niður veiruna og verndum heilbrigðiskerfin,“ sagði Ghebreyesus.

Samkvæmt tölfræðiupplýsingum Johns Hokins-háskólans í Bandaríkjunum hafa nú 46 milljónir manna greinst með kórónuveiruna í heiminum öllum og 1,2 milljónir látist vegna Covid-19, sjúkdómsins sem veiran veldur.