Batakveðjur streyma til Víðis en sumir hneykslaðir

Víðir er á fimmta degi veikinda og var að heyra á honum í gær að þau hjónin væru á uppleið eftir að hafa verið verulega slöpp. Að minnsta kosti fimm aðrir úr þeirra nærumhverfi hafa greinst með veiruna. Hann sagðist í færslu á Facebook vilja vera hreinskilinn með aðdraganda þess að hann smitaðist. Þakka margir honum fyrir og segjast læra af.

Víðir segist hafa smitast af eiginkonu sinni, sem greindist á mánudaginn, en uppruni smitsins er óþekktur. Helgina fyrir greiningu voru þau hjónin að mestu heima við, en þó komu nokkrir gestir í heimsókn. Vinafólk þeirra bjó hjá þeim tímabundið vegna þess að þau þurftu til læknis í Reykjavík og kíktu dætur þeirra í kaffi á sunnudeginum ásamt vinkonu þeirra.

Þungbær staða

„Börn okkar, tengdadóttir og barnabarn komu einnig við og um kvöldið komu til okkar vinahjón sem stoppuðu stutt. Í öllum tilfellum var passað upp á fjarlægðir á milli okkar og gesta og reyndum að forðast sameiginlega snertifleti,“ skrifar Víðir, sem segir það ekki hafa dugað til.

„Við erum búin að fara vel yfir öll samskiptin og höfum fundið að fjarlægð sem var haldin var um eða yfir 2 metra við alla. Hins vegar er ljóst að við pössuðum ekki upp á alla sameiginlega snertifleti. Vatnskanna, kaffibollar og glös hafa sennilega verið sameiginlegir snertifletir sem hafa dugað til að smita.“

Merkja má á færslu Víðis að hann er manna svekktastur með eigin smitvarnir.

„Sjálfur hef ég verið manna duglegastur við að hvetja alla til að passa eigin sóttvarnir og því þungbært að þetta sé staðan. Við getum ekki annað en vonað að við öll, eins og allir þeir fjölmörgu sem eru að berjast við þennan óvætt komum heil út úr þessu.“

Smitskömm ekki í boði

Á annað þúsund manns hafa brugðist við færslu Víðis með kveðju á Facebook. Yfirgnæfandi hluti athugasemdanna eru jákvæðar, óskir um góðan bata og þakkir fyrir heiðarlega frásögn.

Freyr Alexandersson knattspyrnuþjálfari sem starfað hefur með Víði hjá Knattspyrnusambandi Íslands sendir batakveðjur.

„Elsku vinur. Góðan bata. Smitskömm er ekki í boði. Það erum við öll sammála um. Áfram gakk félagi.“

Klara Bjartmarz framkvæmdastjóri KSÍ sendir baráttukveðjur og það gerir Hannes Sigurbjörn Jónsson, formaður Körfuknattleikssambands Íslands líka.

Karl Sigurbjörnsson fyrrverandi biskup er meðal þeirra sem þakka Víði fyrir að deila smitsögunni með fólki. Margrét Blöndal hjúkrunarfræðingur vonar að hjónin nái heilsu sem fyrst.

„Ykkar saga er gríðarlega lærdómsrík og og dýrmæt fyrir okkur öll. Í þessu sem öllu öðru ertu okkar mikilvægi leiðtogi og fyrirmynd. Við treystum á og hlustum á Víði.“

Stuðningur úr þingheimi og frá fjölmiðlum

Hanna Katrín Friðriksson þingmaður Viðreisnar las frásögn Víðis og lærði af.

„Kærar þakkir fyrir þessa frásögn sem er líklega þörf ábending til okkar margra,“ segir Hanna Katrín.

Sigríður Björk Guðjónsdóttir ríkislögreglustjóri sendir Víði batakveðjur og sama gildir um fjölmarga kollega hans úr lögreglunni hvar hann hefur starfað um áratuga skeið.

Þá senda fjölmargir fjölmiðlamenn Víði kveðju. Samskipti fjölmiðla við Víði hafa verið mikil á árinu enda nær daglegur fastagestur á skjánum. Upplýsingafundirnir eru orðnir 140 og hefur Víðir staðið vaktina á langflestum þeirra.

Varð fyrir miklum vonbrigðum

Þó eru aðrir, mun færri en þó nokkrir, sem gagnrýna Víði. Raunar hefur Víðir endurtekið sagt á upplýsingafundum á árinu að gagnrýni sé eðlileg og góð. Og þau hlusti. Hann lækar allar athugasemdir og les því greinilega það sem fólk hefur að segja.

Óli G. Þorsteinsson segist fyrir utan litla skírnarveislu í lok maí hafa hitt sjö manneskjur frá því í mars.

„11 gestir á 48 klst. er „í lagi“. Fjöldatakmarkanalega séð. En starfs síns vegna hefði ég haldið að Víðir ætti, og þyrfti, að taka þetta tölvert mikið alvarlega en almúgamaðurinn. Fyrir utan að vera nánast því „andlit“ persónulegra sóttvarna á Íslandi og fyrirmynd. Öll þessi varnaðarorð þríeykisins um að hafa fjölskylduboð lágstemdari um jólin. Þetta svipað eða meira en sá fjöldi sem ég gerði mér vonir til að geta hitt yfir hátíðirnar. Og miðað við fréttir af ömmukaffi og heimkomupartí og öll hin partíin hjá fólki sem getur ekki hamið sig, þá ríkir engin bjartsýni hér. Ég varð bara fyrir svo miklum vonbrigðum við að lesa þetta,“ segir Óli í færslu á Facebook.

Rithöfundurinn Stefán Máni getur ekki beðið eftir að sundlaugarnar opni aftur.

„Þannig að sundlaugar og líkamsræktaðstöðvar voru ekki vandamálið heldur gestagangurinn heima hjá Víði?“ spyr Stefán Máni á Twitter.

Kristín Sævarsdóttir sendir hlýjar batakveðjur en er hugsi.

„Mér finnst þú hafa umgengist talsvert mikið af fólki á eigin heimili 21. nóvember sl þó að fjarlægðartakmarkanir hafa verið haldnar. Snertifletirnir eru greinilega hættulegir. Kaffikanna, hurðahúnar ofl. Þetta er allt lærdómsríkt.“

Valgerður Þ.E. Guðjónsdóttir sendir sömuleiðis batakveðjur til Víðis en staldrar við heimsóknir á heimili hans.

„Að persóna í þínu embætti sem sagt hefur í a.m.k. hálft ár „við gerum þetta saman“ og að fólk skuli halda sig heima, skuli leyfa sér að taka á móti (eða hleypa inn til sín) svona fjöld af fólki, það er vítavert hugsunar og kæruleysi í það minnsta. Þín persóna er augljóslega ekki lengur fær um að sinna þessu embætti og ættir að segja þig frá því hið fyrsta. Hætta svo að siða aðra en þína eigin fjölskyldu og vinahóp. Þetta er forkastanlegt,“ segir Valgerður.

„Bendi á það sem þú deildir sjálfur þann 10. október s.l. frá Almannavarnadeild Ríkislögreglustjóra - um að það skipi máli að fækka smitleiðum! Hvað á fólk að halda þegar fyrirmynd gengur þvert gegn boðum? Er allt leyfilegt fyrir suma en ekki fyrir aðra?“

Gott dæmi sem megi læra af

Þórdís Björk Sigurþórsdóttir, sem komst í fréttirnar á dögunum þegar lögregla mætti á heimili hennar vegna gruns um að þar væru fleiri en tíu samankomnir, sendir batakveðju.

„En hélduð þið að ef fólk „stoppaði stutt“ að þá væri engin smitthætta? „Ég keyrði undir áhrifum en bara stutta leið.“ „Setti ekki á mig öryggisbelti en var bara að bara rétt að skjótast.“,“ segir Þórdís Björk sem var afar ósátt við athugasemdir lögreglu á heimili hennar á dögunum.

Atli Árnason grípur færslu Víðis á lofti. Fyrst allir megi vita um félagslega virkni hans hljóti hann að mega deila sinni skoðun á því.

Undrast alla þessa félagslegu virkni og gestakomur við núverandi aðstæður. Finnst það ekki í samræmi við opinber skilaboð. Ekki kemur fram að grímur hafi verið notaðar milli aðila sem komu héðan og þaðan. Loftborið smit vegna mettunar inni er miklu líklegra en snertismit í þessu lýsta tilfelli. Vanmat í gangi víða á loftbornu smiti og mettun veirunnar í andrúmslofti. Þetta er að mínu viti gott dæmi um það sem hægt er að læra af!

Atli segist vona að Víðir og fjölskylda og þeir sem sýkist í tengslum við þau nái fljótt góðri heilsu aftur.

Ragnhildur G. Hermannsdóttir sendir batakveðju.

„Vá hvað margir eru að koma í heimsókn til þín, við hjónin erum búin að hlýða þér Víði síðan í vor og höfum varla hitt börn, barnabörn og systkini, nema á „save“ tímabili í sumar, höldum okkur bara í sveitinni! Mér finnst bara fáránlegt að heyra hvað þið hjónin eru að umgangast mikið af fólki inni á heimili ykkar.“

Kveðjunum heldur áfram að rigna á færslu Víðis sem sjá má í heild hér að neðan.