Tengjast öðrum þeirra sem greindist um helgina og lík­lega með breska af­brigðið

Tveir greindust með veiruna innanlands um helgina. Þeir tengjast báðir einstaklingi sem kom til landsins í lok febrúar og greindist jákvæður í seinni landamæraskimun 4. mars. Sá var með hið svokallaða breska afbrigði veirunnar. Báðir sem greindust um helgina eru jafnframt með breska afbrigðið, samkvæmt niðurstöðum úr raðgreiningu. 

Þórólfur Guðnason sóttvarnalæknir segir að þeir sem greindust í gær séu þannig líklega með breska afbrigðið. Annar þeirra er starfsmaður Hagkaups í Garðabæ, líkt og greint var frá í morgun. Niðurstöður úr raðgreiningu ættu að liggja fyrir í kvöld.

„Þeir tveir sem greindust í gær utan sóttkvíar tengjast tilfelli sem greindist um helgina, þannig að þetta er sami hópurinn getum við sagt,“ segir Þórólfur. Hann er ekki með nákvæma tölu yfir það hversu margir hafa verið útsettir fyrir smiti vegna þessa.

„En þetta er fljótt að vinda upp á sig og við ætlum að reyna að taka fast á þessu á þann máta að setja fleiri en færri í sóttkví og fá fólk í sýnatöku og svo framvegis. Þannig að við reynum að taka þetta eins alvarlega og hart á þessu eins og mögulegt er.“

Ánægjulegt að hægt sé að rekja smitin saman

Þá hefur komið fram að annar þeirra sem greindist um helgina, sem starfar á Landspítala, fór á tónleika í Hörpu á föstudag. Allir sem voru á tónleikunum voru boðaðir í sýnatöku í gær en ekkert sýni hefur reynst jákvætt hingað til. Ekki heldur úr skimun á spítalanum. Alls voru fimmtán hundruð sýni greind í gær.

„Og það greindust tveir. Það eru ekki margir, það er bara lágt hlutfall sem betur fer. En við vitum ekki hvað gerist. Við vitum að meðgöngutími sýkingarinnar er töluvert langur þannig að það getur tekið nokkra daga, það þyrfti ekki að koma á óvart að fleiri myndu greinast í dag eða á morgun og næstu daga sem hefðu smitast um síðustu helgi til dæmis,“ segir Þórólfur.

„En við getum allavega rakið öll þessi smit saman, það er ánægjulegt. Ef við hefðum verið að finna fólk án nokkurrar tengingar, það hefði verið öllu alvarlegra.“

Óráðlegt að slaka mikið á

Inntur eftir því hvort hann sé byrjaður að íhuga að herða á aðgerðum innanlands vegna þeirrar stöðu sem nú er uppi segir Þórólfur svo ekki vera. Í það minnsta „ekkert alvarlega“. Þær aðgerðir sem nú eru í gildi gilda til 17. mars.

„Ég þarf að skila minnisblaði núna í vikunni og auðvitað munu þessir atburðir marka mínar tillögur, hvernig það verður svo nákvæmlega er ég ekki tilbúinn að segja núna. Og það fer eftir því hvort eitthvað greinist í dag og á morgun. En mér sýnist nú á öllu að maður geti svosem sagt að það sé ekki ráðlegt að fara að slaka mikið á með þetta í farteskinu.“