Svandís komin með minnisblað Þórólfs

Sóttvarnalæknir hefur lítið viljað gefa upp um nákvæmt innihald tillagnanna en gefið út að hann muni leggja til tilslakanir. Gera má ráð fyrir að minnisblaðið verði tekið til umfjöllunar á fundi ríkisstjórnarinnar á morgun og að ný sóttvarnareglugerð heilbrigðisráðherra verði kynnt í kjölfarið.

Tæpar þrjár vikur eru frá því að stjórnvöld boðuðu hertar sóttvarnaaðgerðir með skömmum fyrirvara þegar kórónuveirsmitum tók skyndilega að fjölga í samfélaginu.  

Aðgerðirnar byggðu í stórum dráttum á þeim sem notaðar voru til að kveða niður þriðju bylgju faraldursins í haust en heilbrigðisyfirvöld vonuðust til að sneggri viðbrögð yrðu til þess að hefja mætti afléttingar fyrr.  

Þórólfur sagði í þættinum Reykjavík síðdegis á Bylgjunni í dag að útlit væri fyrir að hægt væri að standa við þær yfirlýsingar og hefja nú afléttingar í öruggum skrefum. Hann telur vera svigrúm til að rýmka núverandi fjöldatakmörkun sem miðast nú við tíu manns. 

„Menn hafa staðið sig mjög vel. Við erum að greina einstaka smit en þessar hópsýkingar sem við höfum verið að sjá hafa klárlega dottið niður. Það er bara út af því hvað fólk hefur staðið sig vel og farið eftir þeim reglum sem eru í gangi, þannig að ég tel alveg að það sé rúm til að fara hægt í sakirnar.“

Liggur ekki fyrir hvort þau fái seinni skammtinn

Aðspurður hvort ákvörðun hafi verið tekin um bólusetningu fólks undir 70 ára aldri sem hafi fengið bóluefni AstraZeneca sagði Þórólfur svo ekki vera. Hann boðaði fyrir helgi að konum undir 55 ára aldri verði hér eftir boðið að fá önnur bóluefni vegna hættu á sjaldgæfum blóðtöppum. 

Heilbrigðisstarfsmenn á Landspítala sem tilheyra þeim hópi eru meðal þeirra sem fengu fyrri skammtinn af bóluefninu áður en tímabundið hlé var gert á notkun þess.

„Við erum í samfloti með hinum Norðurlöndunum þar sem við erum að skoða málin. Við vitum að það eru rannsóknir í gangi til að skoða hvort það sé hægt að gefa annað bóluefni í öðrum skammti hjá yngra fólki.“

Heilbrigðisyfirvöld í Frakklandi og Þýskalandi hafi tekið ákvörðun um að gefa hópnum seinni skammtinn af mRNA bóluefni á borð við Pfizer/BioNTech eða Moderna.  

Bíða eftir frekari gögnum

„Við vitum út frá öðrum bólusetningum að það hefur virkað ágætlega að blanda saman mismunandi bóluefnum og gefa seinni skammtinn með annarri tegund. En það er ekki alveg vitað með þessa tegund þannig að við erum aðeins að hinkra og sjá hvort við getum fengið betri vitneskju um það.“

Þórólfur bætti við að þeir sem ekki væru taldir í neinni áhættu vegna aukaverkanna myndu fá sinn seinni skammt af efni AstraZeneca. 

Einn greindist með Covid-19 innanlands í gær og var viðkomandi var í sóttkví. 98 eru í einangrun samkvæmt upplýsingum á Covid.is.

Fréttin hefur verið uppfærð.