Rodgers hefur engan áhuga á Tottenham

Þetta fullyrðir Sky Sports í dag. Rodgers er einn þeirra sem helst hafa verið orðaðir við stjórastöðuna hjá Tottenham, eftir að José Mourinho var rekinn, og sá orðrómur varð háværari þegar Julian Nagelsmann var kynntur sem nýr stjóri Bayern München í gærmorgun. Tottenham ku hafa reynt að fá Nagelsmann en án árangurs.

Hinn ungi Ryan Mason stýrir Tottenham út leiktíðina og þarf örugglega að vinna alla fimm leikina sem eftir eru til að eiga möguleika á að ná Meistaradeildarsæti. Tottenham er sem stendur í 7. sæti með 53 stig, fimm stigum á eftir Chelsea sem er í 4. sæti.

Meistaradeildarsæti og bikarmeistaratitill í boði

Leicester er aftur á móti í góðum málum í 3. sæti, með 62 stig, eftir heimasigra gegn Crystal Palace og WBA í síðustu tveimur leikjum. Leicester á hins vegar eftir erfiða leiki og mætir til að mynda Mancheester United, Chelsea og svo Tottenham í síðustu þremur umferðum deildarinnar. Enn er því hætta á að Leicester missi Meistaradeildarsæti úr höndunum á lokasprettinum eins og í fyrra, á fyrsta heila tímabilinu undir stjórn Rodgers.

Rodgers á sömuleiðis möguleika á að fagna titli með Leicester í vor en liðið er komið í úrslitaleik enska bikarsins og mætir þar Chelsea 15. maí.

„Tottenham er frábært félag, eitt af þeim stóru í landinu, risastórt félag. En minn fókus er algjörlega hérna,“ sagði Rodgers þegar hann var spurður út í Tottenham í síðustu viku, og hrósaði allri aðstöðu hjá Leicester.

„Ég er með frábært samband við leikmennina og stjórnina og við erum með okkar áætlanir um þróunina til framtíðar,“ sagði Rodgers.

Veðbankar telja Erik ten Hag, stjóra Ajax í Hollandi, líklegastan til að taka við Tottenham en Rodgers er víða talinn næstlíklegastur.