Fer í góðu jafnvægi inn í sumarið

Síðustu mánuði hafa ýmsar takmarkanir gert okkur erfiðara að halda við æfingarútínu. Líkamsrækt og sundlaugar hafa verið lokaðar stóran hluta vetrar og þegar takmörkunum hefur verið tímabundið aflétt hefur okkur verið ráðlagt að halda okkur frá slíkum stöðum ef kostur er.

Afleiðing þessara aðstæðna er að þúsundir íslenskra kvenna hafa breytt stofum sínum og svefnherbergjum í eigið æfingastúdió. Tími sem var áður varið í að keyra í ræktina er nú varið í heimaæfingar.

Afslöppun og núvitund yfir sumartímann

Sara Snædís Ólafsdóttir, stofnandi Withsara.is,hefur verið daglegur liður af lífi þúsunda íslenskra kvenna síðastliðið árið. Þegar tími gefst er fartölvan opnuð og jógadýnunni rennt út. Sara segir að meðlimir sæki tímana á netinu, með það að markmiði að viðhalda góðri æfingarrútínu, styrkja djúpvöðva líkamans og bæta orku og vellíðan.

Áður en við förum inn í sumarið ætlar Sara að vera með sumaráskorun til þess að efla líkamlegt og andlegt jafnvægi ásamt því að byggja upp styrk og tóna líkaman. Hún segir að það að fara í góðu jafnvægi inn í sumarið hjálpi við að halda í þær góðu heilsuvenjur sem við höfum tileinkað okkur og muni stuðla að enn betri afslöppun og núvitund yfir sumartímann og gefa okkur rými til þess að hlúa vel að okkur fyrir veturinn.

„Áskorunin er fjórar vikur og hefst mánudaginn 3. maí. Þetta er tilvalið tækifæri til þess að koma sér í góða æfingarrútínu fyrir sumarið og verður hægt að taka tímana bæði innan dyra og utan dyra ef veður leyfir,“ segir Sara.

Um helgar er lagt upp úr útiveru og er boðið upp á fjölbreyttar uppástungur um útiæfingar í bland við mini-seríur sem eru stuttar styrktaræfingar sem hægt er að gera fyrir eða eftir útveruna. Á virkum dögum eru 30 mínútna jóga- og styrktartímar í bland, en styrktartímarnir eru tímar sem unnið er með eigin líkamsþyngd í pilates, barre og djúpvöðvaæfingum.

Mikilvægt að vera í núinu

Sara sjálf gerir oft hugleiðslu á gönguferðum í hverfi sínu í Svíþjóð. Á bloggsíðu sinni skrifar Sara um ýmislegt tengt heilsu og vellíðan. Í vikunni gaf Sara þessi fimm ráð til að æfa það að vera meira í núinu.

1. Einbeittu þér að öndun. Mælir hún meðal annars með 4-7-8 öndunartækninni sem hún hefur bloggað um áður. Þetta getur slakað á öllu og róað bæði líkama og huga.
2. Njóttu umhverfisins. Þegar þú flakkar á milli staða, opnaðu augun og horfðu á það sem er fyrir framan þig. Kannski sérðu nýtt tækifæri eða nýtt sjónarhorn til að horfa á verkefnin þín.
3. Einfaldaðu verkefnalistann þinn. Sara segir að það hjálpi oft að skoða í hvað tíminn fer. Er hægt að sameina einhver verkefni eða fækka atriðunum á listanum og geyma þau þar til síðar?
4. Vertu raunsæ/raunsær. Stundum nærðu ekki að gera allt og það er allt í lagi. Við getum ekki gert allt.
5. Vertu heilshugar (e.mindful). Ekki ofhugsa fortíðina eða reyna að spá fyrir um framtíðina. Einbeittu þér að nútíðinni, slakaðu á og andaðu. Einn hlutur í einu.