Stjóri Gylfa segir óánægðum að fara

Ancelotti var spurður út í það hvort hann hygðist fá Moise Kean aftur til Everton í sumar úr láni hjá PSG, þvert gegn vilja leikmannsins, og sagðist þá hafa rætt þessi mál við alla sína leikmenn fyrir skömmu:

„Ef að hann vill vera áfram hjá PSG þá er eina leiðin að ná samkomulagi við PSG. Ég vil ekki hafa leikmenn hérna sem eru óánægðir og þeir geta þá bara beðið um að fá að fara. Ég vil hafa leikmenn sem vilja vera hjá Everton og taka þátt í þessu verkefni.

Þetta gildir um alla leikmenn. Ég mun ekki neyða neinn leikmann til að vera hér. Ég sagði þeim þetta nýverið. Þeir vita þetta. Ef að einhver er óánægður þá verður sá hinn sami að fara. Óánægður leikmaður verður aldrei góður hluti af þessu verkefni,“ sagði Ancelotti.

Everton hefur verið á niðurleið síðustu vikur og aðeins unnið tvo af síðustu ellefu leikjum sínum í ensku úrvalsdeildinni. Liðið er í 9. sæti og þarf á sigri að halda gegn Wolves í dag til að eiga enn möguleika á einu af sjö sætum sem í boði eru í Evrópukeppnunum þremur fyrir ensk lið.

Everton tapaði 1-0 gegn botnliði Sheffield United á sunnudag, þar sem sigurmarkið kom á sjöundu mínútu. Gylfi Þór Sigurðsson lék seinni hálfleikinn en tókst ekki að laga stöðuna fyrir Everton frekar en öðrum í liðinu.