Bylting í bæjarsnattið. Citroën AMI rafsnatti

Meðfylgjandi er fréttatilkynning frá Brimborg.

Citroën er á mikill siglingu í rafbílavæðingu og fyrr á árinu kynnti Brimborg rafbílinn Citroën Ë-C4 sem algerlega hefur slegið í gegn hjá Íslendingum.

Lipur rafsnatti með 75 km drægni á rafmagni

Citroën AMI er krúttlegur, agnarsmár, rafsnatti, 2,41 m á lengd og 1,39 m á breidd. Hann er sérhannaður til borgaraksturs með hámarkshraða 45 km / klst., 75 km drægni á 100% hreinu rafmagni, 5,5 kWh drifrafhlöðu og 6 kW rafmótor og vegur aðeins 420 kg. Hann nær fullri hleðslu á þremur klukkustundum og ekki þarf sérstaka hleðslustöð heldur er innbyggða hleðslusnúran einfaldlega útdregin úr hurðarfalsi og stungið í samband við venjulegan tengil.

Ótrúlega lítill beygjuradíus gerir honum kleift að smjúga um götur borga og bæja og bregða sér í sjaldgæf, agnarsmá, bílastæði.

Citroën AMI rafsnattinn er yfirbyggður með miðstöð með stórum gluggum og panorama þakglugga sem skapar mikið útsýni. Sæti eru fyrir bílstjóra og einn farþega, þeir sitja hátt og eru vel varðir fyrir óblíðu íslensku veðri.

100% endurvinnanlegur og ódýr í notkun

Allir íhlutir Citroën AMI rafsnattans eru 100% endurvinnanlegir og Li-Ion drifrafhlaðan er 85% endurvinnanleg. Yfirbygginginn er symmetrísk sem gerir það að verkum að sömu hlutir eru að framan og aftan og á vinstri og hægri hlið. Það einfaldar framleiðsluferlið, lækkar framleiðslukostnað og rekstrarkostnaður verður umtalsvert lægri auk þess sem einfaldleiki hönnunarinnar lækkar rekstrarkostnað enn frekar.

Orkukostnaður er algerlega í lágmarki enda gengur rafsnattinn Citroën AMI fyrir ódýrri, íslenskri raforku og eyðir litlu sökum þess hversu léttur hann er.

Þjónusta er aðeins á 2 ára eða 20.000 km fresti hvort sem á undan kemur og þá þarf helst að líta til þurrkublaða, hemlavökva, frjóagnasíu ásamt léttri almennri yfirferð. Ábyrgð á drifrafhlöðunni er 3 ár eða 40.000 km og ábyrgð bílsins í heild með þjónustusamningi er 3 ár óháð akstri.

Til kaups eða leigu

Citroën AMI rafsnattinn verður í boði til kaups til almennra fyrirtækja og fyrirtækja sem sérhæfa sig í útleigu en einnig geta fyrirtæki eða einstaklingar valið að leigja. Hann hentar einstaklega vel að taka á leigu í margvíslegt snatt jafnvel niður í nokkrar mínútur, klukkustundir eða dag í senn eða í lengri leigu t.d. til nota á athafnasvæðum fyrirtækja eða til útkeyrslusnatts á afmörkuðum svæðum.

Tilraunaverkefni á Íslandi og sendibílaútgáfa væntanleg

Citroën AMI er tilraunaverkefni Brimborgar í samvinnu við Citroën í Frakklandi en samskonar verkefni er samtímis í gangi í fjölmörgum öðrum löndum í ljósi vaxandi vinsælda margvíslegra nýrra ferðamáta. Í verkefninu felst að kanna hvernig skráningu verður háttað þ.e. er um að ræða bíl eða létt bifhjól, hvernig rafsnattinn reynist við mismunandi aðstæður og við hvaða verkefni hann hentar best.

Citroën hefur þegar kynnt til sögunnar sendibílaútgáfu af AMI þar sem flutningsrými er komið í stað farþegasætis og mun hann koma á markað síðar á árinu.