Snúsari sem missti andann yfir Óla Stef og Johnny Depp

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég er búin að vera á leiðinni að vera týpan sem mætir í ræktina á morgnana í svona fimmtán ár en það hefur ekki komist í rútínu ennþá. Ég vakna um klukkan sjö á morgnana og á það til að snooza eins oft og ég kemst upp með.“

Hvað er það fyrsta sem þú gerir á morgnana?

„Ég lifi því nútímalífi að vera með börnin mín aðra hvora viku. Svo aðra vikuna snýst allt um skipulag og að koma heimilinu í gang án þess að allir verði of seinir. Það minnir mig stundum á byrjunaratriðið í Home Alone, þar sem hver einasti fjölskyldumeðlimur þarf sinn tíma og sína rútínu og ég er í þessu tilviki vel undirmönnuð.

Þegar ég er svo ein þá er það fyrsta sem ég geri er að búa mér til kaffibolla og setja góða tónlist á fóninn. Rólegir morgnar eru minn uppáhaldstími til að núllstilla mig og fara yfir verkefni dagsins og svo klikkar það ekki að ég hringi alla morgna í mömmu á leiðinni í vinnuna.“

Hvaða leikari eða stjarna fékk þig til að missa andann á unglingsárunum?

„Ég verð eiginlega að nefna fyrstu ástina mína sem var Johnny Depp í myndinni Cry Baby. Ég var vissulega ekki unglingur en ég held ég hafi verið um fimm ára gömul þegar ég uppgötvaði þessa mynd. Mamma segir að ég hafi horft á hana nánast daglega á tímabili. 

Þetta er á þessum tíma sem maður lét taka upp myndir á VHS-spólu og mig minnir að nágranninn minn hafi tekið hana upp fyrir mig sem var með áskrift að Stöð tvö.

Annars var ég mikil handboltastelpa sem unglingur og ég held ég hafi einu sinni bókstaflega misst andann við að sjá Óla Stef í Kringlunni. 

Hann var auðvitað átrúnaðargoðið mitt þegar ég æfði með Val.“

Í hvaða verkefni ertu að vinna helst í þessa dagana?

„Ég fékk það skemmtilega verkefni í hendurnar að fá að vera partur af því að setja á laggirnar nýtt fjarskiptafélag sem heitir Kosmos og er í eigu Nova-klúbbsins. Við erum búin að vera á fullu að kynna vörumerkið fyrir Íslendingum, segja frá þjónustu og vöruframboði og hvað Kosmos stendur fyrir. 

Kosmos er fyrsta fjarskiptafélagið á Íslandi sem byggir þjónustu sína nánast alfarið á sjálfvirknivæðingu og gervigreind og nær því að bjóða farsímaáskrift og heimanet á betra verði en hefur verið á markaði. Þetta er búið að vera ótrúlega skemmtileg vegferð og gaman að fá að vera partur af verkefni eins og þessu frá upphafi þar sem maður fær að sjá félagið vaxa og þroskast.

Verkefnin fram undan eru að halda áfram að byggja upp góðan grunn og leyfa félaginu að vaxa á heilbrigðan hátt, hámarka þjónustuferla, bæta vöruframboð og ná góðri fótfestu á miklum samkeppnismarkaði.“

Hvernig skipuleggur þú þig í vinnu?

„Ég er almennt frekar ör og með hugmyndir sem koma á færibandi og því hef ég tilhneigingu til að vilja koma öllum hlutum í verk strax í gær. Þess vegna skiptir skýr forgangsröðun verkefna mig miklu máli. 

Ég er mikill talsmaður verkefnatólsins Asana og hefur það gert góða hluti í fjölþættri verkefnastýringu og vöruþróun þar sem margir aðilar koma að sama verkefninu. 

Fyrir mig persónulega þá er ég farin að tileinka mér helstu gervigreindartólin til stuðnings og skrifa mikið niður í Notes í tölvunni sem eru líklegast óskiljanlegir og samhengislausir punktar ef aðrir myndu lesa yfir þá.“

Hvenær ferðu að sofa á kvöldin?

„Ég held það heyri til undantekninga ef ég er ekki komin upp í rúm fyrir klukkan hálfellefu. Ég er með smá þráhyggju fyrir að ná góðum svefni og reyni að nota öll helstu trikkin í bókinni til að hámarka svefngæði, til dæmis fæ ég mér alltaf magnesíumdrykk fyrir nóttina, var að fjárfesta í góðum myrkvunargardínum og gæti ekki lifað án dagsbirtulampa. 

Það besta sem ég veit er að fara í kvöldsund, taka góða saunu og fara beint heim upp í rúm.“