Umfjöllun og viðtöl: Þróttur R. - ÍBV 3-2 | Andrea Rut tryggði Þrótturum nauman sigur

Þróttur hafði betur gegn ÍBV í Pepsi Max deild kvenna í dag en lokatölur voru 3-2 eftir hörkuleik. Þrátt fyrir tapið er ÍBV þó búið að tryggja sér sæti í Pepsi Max deildinni á næsta tímabili.

Þróttur hafði betur gegn ÍBV í Pepsi Max deild kvenna í dag en lokatölur voru 3-2 eftir hörkuleik. Þrátt fyrir tapið er ÍBV þó búið að tryggja sér sæti í Pepsi Max deildinni á næsta tímabili.

Það var Þróttur sem var sterkari aðilinn í fyrri hálfleiknum og voru nokkur færi sem litu dagsins ljós á fyrsta korteri leiksins. Andrea Rut Bjarnadóttir og Katherine voru allt í öllu í sóknarleik liðsins og sköpuðu mikið af færum.

Fyrsta mark leiksins kom svo að lokum eftir hornspyrnu á 18.mínútu. Andrea Rut gaf flotta sendingu inn á teig þar sem fyrirliðinn Álfhildur Rósa reis hæst og stangaði boltann í netið í sínum 130 leik fyrir félagið.

Eftir þetta mark voru það áfram Þróttarar sem sóttu og sóttu en næsta mark kom hins vegar ekki fyrr en á síðustu mínútu fyrri hálfleiksins. Þá hafði ÍBV verið að sækja en fékk svo skyndisókn á sig í kjölfarið. Andrea Rut fékk boltann inn fyrir vörnina, var ein gegn Auði í marki ÍBV og kláraði einstaklega vel. 2-0 fyrir Þrótti og það var staðan í hálfleiknum.

Í viðtali eftir leik sagði Ian Jeffs að hann hafi ekki sagt mikið við sína leikmenn í hálfleiknum heldur komið inn í klefann í nokkrar sekúndur og sagt þeim að stíga upp og sýna úr hverju þær væru gerðar. Þessi skilaboð Jeffs virtust virka fullkomlega þar sem ÍBV mætti ákveðið til leiks í seinni hálfleikinn og pressaði heimaliðið mikið.

Selma Björt Sigursveinsdóttir kom inn á sem varamaður í leiknum og það var hún sem minnkaði muninn á 65.mínútu eftir frábæra fyrir gjöf frá Liönu Hinds. Staðan orðin 2-1 og ÍBV með yfirhöndina. Það tók svo ekki langan tíma fyrir þær að jafna metin því aðeins þremur mínútum seinna átti Clara Sigurðardóttir þrumuskot langt fyrir utan teig sem Íris Dögg átti ekki möguleika í og boltinn söng því í netinu. Staðan orðin 2-2 og æsispennandi lokakafli framundan.

Liðin skiptust á að sækja og það var ef til vill ÍBV sem var líklegra á lokakaflanum til þess að næla í sigin þrjú. Það varð þó ekki raunin því á 87.mínútu átti Ólöf Sigríður frábæra fyrigjöf inn á teig þar sem Andrea Rut lúrði og skoraði sitt annað mark í leiknum sem reyndist vera sigurmarkið. Lokatölur 3-2.

Með sigrinum fer Þróttur í 29 stig og tryggir sér þriðja sætið í deildinni. Þrátt fyrir tapið náði ÍBV samt sem áður að tryggja sér öruggt sæti í deildinni þar sem Fylkir tapaði.

Afhverju vann Þróttur?

Sóknarleikur Þróttar var eflaust ögn öflugri í dag ef litið er á leikinn í heild sinni. Þróttur átti nánast allar góðu sóknirnar í fyrri hálfleiknum á meðan ÍBV var með yfirhöndina stóran hluta af seinni hálfleiknum. Andrea Rut var hreint út sagt frábær í liði Þróttar, skoraði tvö mörk og lagði upp eitt.

Hverjir stóðu uppúr?

Maður leiksins að mínu mati var klárlega Andrea Rut Bjarnadóttir. Í hvert skipti sem hún fékk boltann þá virtist skapast hætta við mark ÍBV. Hún skoraði tvö mörk og lagði upp fyrsta markið á Álfhildi. Frábær leikur hjá Andreu og hún var eflaust munurinn á liðunum í dag.

Hvað fór illa?

Það var mikið um lélegar sendingar í sóknarleik ÍBV, oft á tíðum þar sem leikmenn voru að fá boltann á góðum stað en voru þá kannski full fljótir á sér og gáfu of fastar eða of lausar sendingar sem eyðilagði þá álitlega sókn. Gerðist trekk í trekk í leiknum og var Ian Jeffs ekki nægilega ánægður með það eftir leik.

Hvað gerist næst?

Næsta helgi er lokaumferðin þar sem Þróttur mætir í Kópavoginn og mætir Breiðablik á meðan ÍBV fær Fylki í heimsókn.

Nik: Hleyptum þeim inn í leikinn

,,Það er auðvitað frábært að fá stigin þrjú. Ég held að hvorugt liðið hafi spilað eins vel og það getur. Við hefðum líklega átt að gera út um leikinn í fyrri hálfleikinn en við gerðum það ekki, sem kom í bakið á okkur í seinni hálfleiknum en sem betur fer náðum við sigurmarkinu í lokin,” byrjaði Nik á því að segja.

Yfirburðir Þróttar voru töluverðir í fyrri hálfleiknum en Nik segir að ÍBV hafi ætlað að pressa hátt en liðið hans hafi spilað boltanum hratt.

,,Við spiluðum boltanum hratt sem kom í veg fyrir að þeirra hápressa virkaði. Í seinni hálfleiknum héldu þær því síðan áfram en þá náðum við ekki að leysa nægilega vel úr því sem gerði það að verkum að þær komust aftur inn í leikinn og skoruðu þessi tvö mörk.”

Andrea Rut átti frábæran leik fyrir Þrótt og var Nik mjög ánægður með hennar frammistöðu.

,,Það er frábært að vera með svona leikmann í liðinu þínu. Við erum svolítið búin að vera að bíða eftir þessu frá Andreu. Síðasta stoðsending hennar kom í júlí og þess vegna var frábært að sjá hana fá eina í dag sem og tvö frábær mörk,”endaði Nik á því að segja.