Kaup Helga í Arion banka, sem eru gerð í gegnum eignarhaldsfélagið Hofgarðar, komu í kjölfar þess að hann seldi allan 6,2 prósenta hlut sinn í Bláa lóninu undir lok ágústmánaðar á þessu ári til fjárfestingafélagsins Stoða.
Samkvæmt lista yfir alla hluthafa Arion banka í lok síðustu viku, sem Innherji hefur séð, átti félag Helga um 3,5 milljónir hluta að nafnverði. Gengi bréfa Arion, sem hafa hækkað um meira en 100 prósent frá áramótum, stóð í 191 krónum á hlut við lokun markaða í dag og er hlutur Helga því verðmetinn á liðlega 670 milljónir.
Skömmu eftir að Helgi seldi hlut sinn í Bláa lóninu gerði Sigurður Arngrímsson, fjárfestir og einn af stærri hluthöfum Bláa lónsins um árabil í gegnum eignarhaldsfélagið Saffron Holding, slíkt hið sama – hlutur hans nam einnig 6,2 prósentum – þegar hann seldi bréf sín í ferðaþjónustufyrirtækinu til Blávarma, félags í eigu fjórtán lífeyrissjóða, fyrir jafnvirði um 3,8 milljarða króna.
Samkvæmt heimildum Innherja seldi Helgi, sem hafði verið stjórnarformaður Bláa lónsins um árabil, hlut sinn á lítillega lægra verði en í tilfelli Sigurðar.
Helgi hefur verið aðaleigandi Torgs, sem rekur Fréttablaðið, Hringbraut og DV, frá því haustið 2019. Á síðasta ári minnkuðu tekjur félagsins um tæplega 300 milljónir og nam tap á rekstrinum um 600 milljónum króna.
Hagnaður Hofgarða á síðasta ári var um 420 milljónir króna og bókfært eigið fé félagsins stóð í tæplega 3 milljörðum króna í árslok.
Innherji er nýr sjálfstæður áskriftarmiðill innan Vísis sem mun einkum beina kastljósinu að viðskiptalífinu, efnahagsmálum og stjórnmálum. Fyrst um sinn verður efnið endurgjaldslaust og aðgengilegt öllum á Vísi en með tímanum verður einungis hægt að nálgast Innherja gegn greiðslu. Áhersla er lögð á vandaðar fréttir, fréttaskýringar, viðtöl og hlaðvörp auk þess sem Innherja er ætlaður að vera vettvangur skoðanaskipta fólks úr atvinnulífinu og stjórnmálum.
