Vill gera listina aðgengilegri með sýningum í heimahúsum

Undirrituð fékk að heyra í þessari listakonu og fræðast nánar um væntanlegar heima sýningar.

Gallerí Heima er nýtt fyrirkomulag sýninga þar sem listin tekur yfir heimili fólks og verður heimilið að galleríi yfir eina helgi. Ef það er eitthvað sem þessi síðustu tvö ár hafa kennt okkur, er það þá ekki einmitt að það er hægt að gera allt heima?

Júlíanna segir að hugmyndin að Gallerí Heima hafi kviknaði hjá sér út frá þeim hugleiðingum um að skapa rými til þess að gera listina aðgengilegri fyrir alla.

„Oft er listin háfleyg og nær til útvaldra sem sækjast í hana, á fínum og flottum galleríum og söfnum. Gallerí Heima er alls ekki mótvægi gegn því - heldur einungis önnur leið til þess að nálgast og sýna listina, bæði fyrir áhorfandann og fyrir listamanninn“.

Hún segir að það sé oft ákveðinn hópur fólks sem sækir í galleríin og söfnin og er það oft fólk sem hefur sérstakan áhuga eða tengingu á þessa staði. Flest allir stundi það að fara í heimsókn til annars fólks og með því að halda listasýningu í heimahúsi nærðu mögulega til fjölbreyttari hóps af fólki.

Rými til að prófa sig áfram

„Eins verður sýningarrýmið aðgengilegra listamanninum, en það að fá að sýna í galleríum og söfnum getur verið mjög erfitt að fá og oft eitthvað sem planað er marga mánuði fram í tímann. Heima eru hlutirnir heimilislegir, með rými til þess að prófa sig áfram, henda sér í djúpu laugina og skella verkunum sínum upp á vegg og skapa þannig til samtals um þau, ferlið og umfangsefnin yfir kaffibolla og vöfflum með rjóma.“

Júlíanna vonast til að heima sýningarnar verði fleiri á komandi ári, heima hjá mismunandi fólki. Hún sýnir helgina ný verk um helgina ásamt eldri og verður ýmislegt í boði. Málverk og textílverk, teikningar og textar, stór og lítil verk. Flest verkin verða til sölu og verður breitt verðbil frá eftirprentunum upp í stærri verk. Þeir sem leita eftir listrænni jólagjöf gætu því fundið eitthvað við sitt hæfi!

Júlíanna er myndlistarkona sem fæst við hina ýmsu miðla og notar þá til að fjalla um, fanga og fagna mýktinni og tilfinningunum. Verk hennar einkennast af litagleði og búa yfir hlýlegri og afslappaðri berskjöldun. Hún segist óhrædd við að notfæra sér mismunandi efni í verkum sínum og hefur undanfarið verið að einbeita sér að því að brjóta upp hinn ferhyrnda ramma og mýkja hann með sveigjum í óreglulegum formum sem tala vel til verkanna sjálfra.

Þessi listakona stundar nám við Listaháskólann í masternámi í myndlist og hefur undanfarin tvö ár haldið einkasýningar, sem og sýnt á samsýningum í Reykjavík.

Sýningin er haldin á Ránargötu 9 og er opin bæði á laugardag 4. des og sunnudag 5. des frá 12:00-18:00. Ásamt Júlíönnu verður Helga Lind á staðnum en sýningin fer fram á heimili Helgu. Þær taka á móti ykkur með kaffi ilm og vöfflujárninu verður skellt í sambandi. Allir hjartanlega velkomnir og þær hvetja gesti til að muna eftir grímunni en sprittið verður á sínum stað! Nánari upplýsingar um sýninguna má nálgast hér.