Viðskiptaverðlaun Innherja 2021: Ásta, Sindri og Arnar tilnefnd í flokknum Kaupmaður ársins

Ásta Sigríður Fjeldsted er framkvæmdastjóri Krónunnar. Hún hefur vakið mikla athygli fyrir vasklega framgöngu undanfarin misseri. Haft er orð á því í rökstuðningi dómnefndar að Ásta sé áberandi í starfi sínu og alltaf skrefi á undan keppinautunum, ekki síst með tilliti til þróunar tæknilausna landsmönnum til hægðarauka. 

„Framtak Krónunnar, Skannað og skundað, undir styrkri stjórn Ástu hefur sparað minni fjölskyldu margar klukkustundir á viku. Fyrir það eitt á Ásta verðlaun skilið en þess fyrir utan hefur hún sterka sýn, augljósa þekkingu á viðfangsefninu og er ekki hrædd við breytingar," kom meðal annars fram hjá dómnefnd Innherja.

Sindri Snær Jensson er kaupmaður í fataversluninni Húrra og veitingamaður í Flatey pizza, sem rekur þrjá staði, og Yuzu Burger sem rekur tvo. Þá opnaði hann ásamt viðskiptafélaga sínum Jóni Davíð Davíðssyni skemmtistaðinn Auto í Lækjargötu á dögunum. 

Í rökstuðningi dómnefndar vegna tilnefningarinnar er Sindra lýst sem andliti hópsins út á við. Hann sé hógvær, byggi upp sín fyrirtæki jafnt og þétt og „hafi ekki þörfina til að sigra heiminn." Sindri hafi með dugnaði og eljusemi byggt upp hóflegt en stórskemmtilegt viðskiptaveldi í Reykjavík.

Arnar Sigurðsson á og rekur frönsku netverslunina Sante sem hefur lager á Íslandi og selur vín. „Af augljósum ástæðum er Arnar kaupmaðurinn með stóru K-i," segir í rökstuðningi dómnefndar en þar er honum lýst sem þrjóskum og glerhörðum töffara sem hefur staðið einn og óstuddur í baráttu sinni við að koma almenningi undan einokun ríkisins á verslun með áfengi. Hann hafi séð tækifæri í aldagömlum boðum og bönnum. 

„Ástríða kaupmannsins fyrir vörunum sem hann selur og afneitun á regluverki sem hvorki stenst tímans tönn né mætir síbreytilegum óskum frjálsra Íslendinga um vöruúrval fleygir honum yfir girðingarnar og hindranir og vörurnar lenda á endanum í fangi viðskiptavina. Líka á sunnudögum.”

Tilnefningar í fleiri flokkum birtast á Innherja á næstunni

Tilnefnt er til verðlauna í eftirfarandi flokkum og munu tilnefningarnar birtast á síðum Innherja á næstu dögum:

• Kaupmaðurinn
• • Fyrirtæki eða einstaklingur sem vakið hefur athugli í rekstri og viðskiptum með vörur til einstaklinga og fyrirtækja.
    
    
• Tækniundrið
• • Fyrirtæki sem vakið hefur athygli fyrir nýja tækni, tæknivæðingu, tækniforrit og/eða tækniþjónustu.
    
    
• Spámaðurinn
• • Fyrirtæki eða einstaklingur sem þótt hefur framúrskarandi í mati og skýringum á til dæmis hagkerfinu, fjármagnsmörkuðum, atvinnugeirum og/eða stjórnmálum.
    
    
• Rokkstjarnan
• • Bjartasta vonin í íslensku atvinnulífi. Fyrirtæki sem vakið hefur athygli og þykir líklegt til þess að vaxa og ná árangri.
    
    
• Samfélagsstjarnan
• • Fyrirtæki sem vakið hefur athygli fyrir framlag til samfélagsins í formi stuðnings við til dæmis góðgerðarmál, jafnréttismál, íþrótta- og tómstundaiðkun, umhverfismál og þess háttar.
    
    
• Jafnframt verða Viðskipti ársins 2021 tilkynnt auk þess sem Viðskiptamaður ársins er valinn. Þá verða veitt sérstök Heiðursverðlaun íslensks atvinnulífs.

Innherji er nýr sjálfstæður áskriftarmiðill innan Vísis sem mun einkum beina kastljósinu að viðskiptalífinu, efnahagsmálum og stjórnmálum. Fyrst um sinn verður efnið endurgjaldslaust og aðgengilegt öllum á Vísi en með tímanum verður einungis hægt að nálgast Innherja gegn greiðslu. Áhersla er lögð á vandaðar fréttir, fréttaskýringar, viðtöl og hlaðvörp auk þess sem Innherja er ætlaður að vera vettvangur skoðanaskipta fólks úr atvinnulífinu og stjórnmálum.