„Það fyrsta sem við sjáum er foreldri að hnoða barnið sitt“

„Maður býst einhvern veginn alltaf við því þegar maður fer í sína fyrstu endurlífgun að það sé aldraður einstaklingur því það er lang algengustu endurlífganirnar sem við förum í. Við löbbum þarna inn í íbúðina og það fyrsta sem við sjáum er foreldri að hnoða barnið sitt. Ég bjóst ekki við því að þetta yrði mín fyrsta endurlífgun, þar sem ég hnoða barn í fyrsta skipti. Ég vissi alveg út í hvað ég væri að fara þegar ég færi í þetta starf en maður pælir ekki mikið í þessu. Því miður komum við þarna of seint og ekkert sem við gátum gert,“ segir Áslaug og heldur áfram.

„Við fluttum þennan einstakling ekki á sjúkrahús. Við vorum öll sátt við okkar vinnu á þessum vettvangi þó þetta hafi verið mjög sorglegt og það er rosalega skrýtið að upplifa það að vera inni á heimili hjá fólki þar sem það er ungur einstaklingur látinn á gólfinu og foreldrið stendur þarna yfir honum. Þetta er einhvern veginn eins og að vera staddur inni í bíómynd, tilfinningin er einhvern veginn svo óraunveruleg. Allavega þarna þegar ég er nýr starfsmaður. Ég vissi ekki hvernig ég átti að haga mér því svo tökum við bara dótið okkar og förum.“

Hér að neðan má sjá atriði úr síðasta þætti af Baklandinu.

Í þáttunum Baklandið er farið yfir allskonar tilfelli en atburðirnir og staðsetningar þeirra kunna að hafa verið breytt vegna þagnarskyldu slökkviliðsins. Daníel Bjarnason er umsjónarmaður þáttanna.