Sigraðist á alkó­hól­isma, mænuskaða og þung­lyndi með kælimeðferð og öndun

Kæling og öndunartækni sem hreinlega björguðu hans lífi. Vala Matt fór og hitti Andra í Íslandi í dag á Stöð í gærkvöldi og fékk að heyra allt um ótrúlega einfalda öndunartækni þar sem streitan og vanlíðanin hreinlega rennur af manni.

Og svo skoðaði Vala einnig hvernig Andri fer reglulega ofan í frystikistuna sína. En Vala sýndi í fyrra í Íslandi í dag viðtal við unga konu á Selfossi sem notaði frystikistuna sína til kælingar og vakti það gríðarlega athygli.

„Þegar ég er þrettán ára gamall lendi ég í slysi á Akureyri þegar ég dett á milli hæða og lendi á grindverki, algjörlega á mjóbakinu. Ég er fluttur upp á sjúkrahús og þar er verið að reyna finna hvað sé að mér. Ég finn ekki fyrir löppunum á mér þarna. Eftir smá tíma fæ ég mátt í lappirnar og það var haldið að þetta væri svokallað mænusjokk,“ segir Andri en þegar hann fór að stækka meira með aldrinum fór hann að fá mikla taugaverki í fótleggjunum og alveg upp í haus.

Byrjaði að nota áfengi ungur

„Ég byrjaði að nota áfengi mjög ungur og þurfti að hætta öllu sem ég var að gera eins og fimleikum og svo líður bara tíminn og ég er alltaf að fara með foreldrum mínum til sérfræðinga til að reyna finna hvað sé að, en við finnum aldrei neitt. Svo þróast þetta hægt og rólega og svo dynja yfir mig áföllin í lífinu eins og gengur og gerist, en pabbi minn deyr þegar ég er átján ára gamall og ekki var það til að hjálpa með drykkjuna,“ segir Andri sem á í dag eina tvítuga stúlku með fyrrverandi eiginkonu sinni. Hann segist ekki verið stoltur af því hvernig hann hafi alið hana upp þar sem áfengi stjórnaði í raun lífi hans.

„Síðan er ég greindur með mænuskaða mörgum árum seinna og þá fer ég á lyf, og fleiri lyf og þau virkuðu öll. Eina sem ég varð að gera að passa upp á að það væri alltaf til vikuskammturinn. Svo var einn fjölskyldulæknir sem spurði mig einn daginn hvort ég væri nú ekki að taka of mikið af þessu en ég neitaði því og náði að réttlæta allt fyrir mér. Svo var ég með sjálfsvígshugsanir inn á milli og reyndi að drepa mig einu sinni en það virkaði ekki sem betur fer, tók ekki nógu mikið af töflum.“

Hann segist hafa áttað sig á því með tímanum að hann bæri sjálfur ábyrgð á eigin heilsu og hann þyrfti að finna sjálfir í sér.

„Fyrst þegar ég gerði þessa Wim Hof öndum, ég hef aldrei upplifað annað eins á ævinni. Kerfið fór í gang og ég kom dagsdaglegri öndun í lag. Ég róaðist allur niður og allt kerfið róaðist. Það var ekki fyrr en þarna sem ég fór að vinna með öndun og kuldann, þá bara breyttist allt. Bólgurnar í bakinu minnkuðu um áttatíu prósent og ég losnaði við öll lyfin. Öndun skiptir öllu máli.“

Hér að neðan má sjá innslagið í heild sinni.