Viðskipti innlent

Ballið að byrja á loðnuvertíðinni

Kristján Már Unnarsson skrifar
Um borð í Ásgrími Halldórssyni SF við Hrollaugseyjar undan Hala í Suðursveit í gær.
Um borð í Ásgrími Halldórssyni SF við Hrollaugseyjar undan Hala í Suðursveit í gær. Guðmundur Borgar/Skinney-Þinganes

Fundur stórrar loðnutorfu grunnt undan Suðausturlandi markar kaflaskil á yfirstandandi vertíð en þar með er staðfest að loðnan er gengin upp á landgrunnið, byrjuð að þéttast í torfur og að nálgast sitt verðmætasta form.

Núna má segja að loðnuævintýri vetrarins sé hafið fyrir alvöru og búið að færast nánast upp í landsteina en í fréttum Stöðvar 2 kom fram að tíu skip mokuðu upp úr loðnutorfunni skammt undan Jökulsárlóni. Þau höfðu landsýn á tignarlegan Öræfajökul, eins og sást á myndum sem kokkurinn á Ásgrími Halldórssyni, Guðmundur Borgar, tók.

Hákon EA að veiðum í gær með Öræfajökul í baksýn.Guðmundur Borgar/Skinney-Þinganes

Frá útgerðinni á Hornafirði fengust þær upplýsingar að loðnan væri góð og falleg og að það styttist í að hún komist í sitt verðmætasta form. Það þýðir að vinnslan í landi mun úr þessu færast úr bræðslu og meira yfir í frystingu til manneldis. Hrognafylling loðnunnar virðist þegar orðin nægilega mikil til frystingar fyrir markaði Austur-Evrópu og stutt í að hún nálgist kröfur Japansmarkaðar.

Langhæsta verðið fæst þó fyrir loðnuhrognin en reynslan sýnir að hrognatakan gæti hafist undir lok mánaðarins. Þær útgerðir sem hlutfallslega minnst eiga eftir af kvótanum halda því enn að sér höndum með að hefja lokasprettinn, vilja eiga nóg eftir fyrir verðmætustu veiðina, fari svo að kvótinn verði skertur. 

Endanleg niðurstaða um aflaheimildir ræðst hins vegar af yfirstandandi loðnumælingum hafrannsóknaskipsins Árna Friðrikssonar á Vestfjarðamiðum, en hér má sjá siglingaferil skipsins.

Hér má sjá frétt Stöðvar 2.

Hér má sjá frétt með viðtali við forstjóra Hafrannsóknastofnunar um yfirvofandi kvótaskerðingu í loðnunni:

Loðnuveiðar Sjávarútvegur

Tengdar fréttir

Loðnuskip komin í mokveiði grunnt undan Jökulsárlóni

Stór loðnutorfa er fundin grunnt undan Suðursveit, sem markar kaflaskil á vertíðinni til þessa. Tíu loðnuskip eru komin á svæðið, átta íslensk og tvö færeysk, og mokveiða upp úr torfunni.

Bíða eftir kallinu að hefja gulltíma loðnuveiðanna

Hafrannsóknaskipið Árni Friðriksson sigldi nú undir kvöld áleiðis á Vestfjarðamið til loðnumælinga, sem ráða úrslitum um endanlegan loðnukvóta. Á sama tíma bíður stór hluti loðnuflotans í startholunum að hefja verðmætasta veiðitímabil íslensks sjávarútvegs, eltingaleikinn við hrygningarloðnuna.

Hundfúlir að þurfa að hætta í mokveiði á loðnumiðunum

Loðnuskipin streyma núna í höfn, hvert af öðru, eftir að Hafrannsóknastofnun varaði við yfirvofandi kvótaskerðingu. Skipstjórinn á Venusi segir að menn verði bara að taka þessu en viðurkennir að þeir séu hundfúlir.

Gerir hlé á loðnuveiðum vegna viðvörunar um kvótaskerðingu

Ný mæling á loðnustofninum, sem kynnt var síðdegis, bendir til að skerða þurfi loðnukvótann á yfirstandandi vertíð um eitthundrað þúsund tonn, eða um ellefu prósent. Þetta gæti þýtt fjögurra milljarða króna minni tekjur þjóðarbúsins en áður var vænst. Vinnslustöðin brást strax við með því að láta skip sín hætta veiðum.



Mest lesið


Fleiri fréttir

Sjá meira


×

Mest lesið