„Lífið er ekki alltaf prumpandi glimmer“

Leiklistarnámið opnaði á mikla naflaskoðun

„Eigin vanlíðan leiddi mig á þessa braut. Ég hef alltaf munað eftir mér með lítið sem ekkert sjálfstraust, enga trú á sjálfri mér og bara alltaf þótt ég síðri en næsti maður. Svo þegar ég fer í leiklistarnám í London að þá datt ég enn dýpra í þessa vanlíðan og námið reyndist mér mjög erfitt, andlega sem og líkamlega.“

Segir Rakel um námið sem hún fór í út í London en myndi þó ekki breyta neinu.

„Þetta voru bestu og mest krefjandi ár lífs míns en vá hvað ég myndi ekki vilja breyta neinu, ég segi alltaf að allir ættu að skella sér í leiklistarnám, bara til þess að kynnast sér og upplifa þessa svakalegu naflaskoðun sem fer þar fram, sem er ótrúlega dýrmæt.“

Gekk á vegg eftir námið

Rakel upplifði mikinn kvíða á þessum tíma og kvíðaköstin urðu alltaf fleiri og fleiri. Hún segir aldrei hafa verið sett neitt spurningarmerki við þessa líðan í leiklistarnáminu þar sem það sé svolítið þekkt að námið sé krefjandi. Hún segir námið brjóta mann niður áður en það byggir mann upp en sjálf upplifði hún aldrei uppbygginguna.

„Svo þegar ég útskrifast kunni ég ekkert á allar þessar tilfinningar sem búið var að galopna fyrir og gekk þá á minn vegg.“

Þegar Rakel hafði komið heim í sumarfrí úr náminu hafði hún reglulega leitað til Hrafnhildar hjá Andlegri einkaþjálfun, enda haft mikinn áhuga á andlegri líðan síðan hún var ung. Eftir útskriftina úr leiklistinni náði hún sínum botni og byrjaði að huga að andlegu heilsunni af fullum krafti. Þá sá hún auglýst kennaranám í andlegri einkaþjálfun og fann strax að það væri fyrir sig.

„Þetta var stórt skref út fyrir þægindaramman en ég fann að þetta var eitthvað fyrir mig og skellti mér í það og er þetta besta fjárfesting sem ég hef gefið mér. Ég hélt áfram vinna í eigin heilsu í náminu og lærði einnig að miðla til annara. Svo heldur sjálfsræktin út lífið, það er engin endastöð.“

Sjálf byrjuð að kenna

Rakel útskrifaðist úr náminu í fyrra og er hún sjálf byrjuð að taka að sér skjólstæðinga ásamt því að vera gestakennari hjá Andlegri einkaþjálfun, þar sem Rakel var í náminu. Hún nýtur þess að fylgjast með fleirum andlegum einkaþjálfurum springa út og blómstra á sinn einstaka hátt. Sjálf útskrifaðist hún úr fyrsta hópnum ásamt sjö öðrum konum en það styttist í útskrift hjá öðrum hóp. Hún segir fallegt samfélag af andlegum einkaþjálfurum vera að myndast á landinu.

Gamlir lyklar opna ekki nýjar dyr

Aðspurð hvernig slík þjálfun fari fram segir Rakel það mikilvægt að manneskjan sé tilbúin að vinna í sér og gefa sér tímann sem það tekur að byggju upp gott andlegt þol. 

„Ég get ekki labbað fyrir þig en ég get labbað með þér, gefið þér verkfæri og hvatningu í átt að þér sjálfri og í átt að því góða lífi sem þú átt svo sannarlega skilið,“

segir Rakel sem bætir því við að allir eigi rétt á því að vinna í sér, sama hver fyrri saga einstaklingsins er.

„Það er svo mikið norm að huga að góðu mataræði og hreyfa sig reglulega en svo gleymum við að skoða okkar innri heim, bakpokinn okkar fyllist af allskonar óuppgerðum tilfinningum og við erum oft á tíðum að takmarka okkur og okkar líf óþarflega mikið.“

Rakel vill hvetja alla til þess að rækta andlegu hliðina á sama tíma og þá líkamlegu og muna að huga vel að sér. Hún segir að Covid hafa kennt okkur að hægja aðeins á okkur þar sem hraðinn í dag sé svakalegur og taki meira en hann gefur.