Búa sig undir aftakaveður: „Það má segja að við séum í ákveðnu formi“

Otti Rafn Sigmarsson, formaður Slysavarnafélagsins Landsbjargar, segir björgunarsveitarfólk mjög vel undirbúið, enda er þetta í annað sinn á innan við mánuði sem rauðar viðvaranir taka gildi vegna veðurs.

„Það má segja að við séum í ákveðnu formi, þessa dagana alla vega. Það er búið að vera ótrúlega algengt, þessar viðvaranir og verkefni þeim tengdum,“ sagði Otti í viðtali hjá Reykjavík Síðdegis á Bylgjunni í dag.

Hann sagði þó nokkra vera í startholunum og vísaði til þess að björgunarsveitirnar hafi það sem af er ári farið í 277 útköll.

„Í þessum 277 útköllum hafa mætt tæplega 1400 manns þannig þetta er töluvert af fólki. Á útkallslistum félagsins eru um 4000 manns sirka og það eru flestir klárir í slaginn,“ sagði Otti.

„Björgunarsveitirnar eru alltaf til taks og yfirleitt er búnaðurinn bara klár og menn tilbúnir að bregðast við með mjög stuttum fyrirvara en þegar það er búið að lýsa yfir almannavarnastigi þá kannski týnist fólk í björgunarsveitarhúsin og er meira klárt á staðnum heldur en á venjulegum degi.“

Mikilvægt að færri séu á ferli

Ríkislögreglustjóri ákvað í samráði við alla lögreglustjóra að lýsa yfir óvissustigi almannavarna vegna óveðursins í dag og tók óvissustig gildi klukkan 17. Þá verður samhæfingarstöð almannavarna starfrækt fram til morguns.

„Það verður væntanlega bara aftakaveður á öllu landinu og þess vegna er svo mikilvægt að þessar viðvaranir séu gefnar út og fólk taki þessu alvarlega, því að þetta hefur áhrif. Því færri sem eru á ferðinni og fleiri vakandi yfir því sem getur fokið, því minna verður af verkefnum og þetta gengur bara auðveldara yfir,“ sagði Otti.

Gera má ráð fyrir að veðrið verði verst á suðvesturhorni landsins fram til morguns. Rauðar viðvaranir verða í gildi fram til klukkan ellefu í kvöld en þá taka við appelsínugular og síðar gular viðvaranir.

„Það er útlit fyrir vatnsveður frekar en ófærð og því fylgir þá auðvitað að þakplötur að fjúka, og skilti, og tilfallandi flóðaverkefni eða vatnsverkefni og þess háttar,“ sagði Otti.

Aðspurður um hvað fólk getur gert til að lágmarka hættuna á tjóni sagði Otti það vera hinar hefðbundnu slysavarnir sem Íslendingar hafa komið til með að þekkja.

„Það er auðvitað bara fyrst og fremst að skoða hvað er að fara að gerast og bregðast við þessum viðvörunum sem eru í gangi, en heimavið er það auðvitað bara að halda áfram að tryggja allt lauslegt og moka frá niðurföllum, þessar hefðbundnu slysavarnir,“ sagði Otti.

„Við erum auðvitað bara klár í slaginn og bregðumst við kallinu ef að það kemur. Nú auðvitað ef þetta gengur yfir án þess að það verði eitthvað um að vera þá verðum við mjög fegin og getum bara verið áfram heima að horfa á sjónvarpið eins og hinir, það er bara fínt líka.“