Baráttan um miðana níu hundruð hefst klukkan tíu

Kolbeinn Tumi Daðason skrifar 28. apríl 2022 15:38

Frá gömlu síldarvinnslunni eitt gott Bræðslukvöld. Ingibjörg Torfadóttir

Telja má líklegt að einhverjir hristi hausinn um hádegisbil á morgun þegar þeir átta sig á því að miðasölu á Bræðsluna 2022 er lokið. 900 miðar eru í boði á hátíðina og í ljósi reynslunnar má reikna með að miðarnir rjúki út á augabragði. Þeir sem sofa á verðinum gætu því misst af miðum enda uppsöfnuð þrá landsmanna og ferðamanna eftir tónleikastemmningu eftir faraldurinn.

Bræðslan fer fram í 17. skiptið á Borgarfirði eystra laugardaginn 23. júlí. Sem fyrr fer skemmtunin fram í gömlu síldarbræðslunni sem Borgfirðingar breyta í tónleikahöll eitt kvöld ár hvert. Auk sjálfra Bræðslutónleikanna hefur skapast mikil hefð fyrir tónleikahaldi í öðrum samkomuhúsum í vikunni fyrir Bræðslu. Aðdáendur lifandi tónlistar fá því nóg fyrir sinn snúð á Borgarfirði flestar helgar í sumar.

Listafólkið sem fram kemur á Bræðslutónleikum sumarsins er að vanda fjölbreyttur hópur, enda markmið hátíðarhaldara að sem flestir finni eitthvað við sitt hæfi, en helsta einkennismerki hátíðarinnar er sá fjölskylduandi sem þar ríkir.

Ung og efnileg söngkona, Malen Áskelsdóttir mun verða fyrst á svið þetta árið og þá stíga þar á stokk hin frábæra hljómsveit Flott sem hlaut nýverið íslensku tónlistarverðlaunin fyrir besta lag síðasta árs, auk þess að vera valin þar bjartasta vonin.

Svona var staðan á tjaldsvæðinu á Bræðslunni sumarið 2014.Vísir/Kolbeinn Tumi

Reynsluboltarnir og Bræðsluvinirnir Mugison og KK munu koma fram saman og stórsveitin og aldamótabandið Írafár treður upp með Birgittu Haukdal fremsta í flokki. Það er svo Bræðslunni sérstakur heiður að bjóða þetta árið upp á eina af stærstu og vinsælustu hjómsveitum landsins – þjóðlagaþungarokksbandið Skálmöld.

„Borgarfjörður eystra hefur eflst gríðarlega sem áfangastaður fyrir ferðafólk á síðustu árum og gestir Bræðslunnar ættu að kanna hvað er í boði þar inn á vefnum borgarfjordureystri.is. Þar má fræðast um framboð gistingar, veitingastaða og afþreyingar, en göngusvæðið í kringum Borgarfjörð er einstakt og upplagt að tengja ferðalag þangað við heimsókn í Bræðsluna. Önnur dagskrá í firðinum í sumar og þá sérstaklega í aðdraganda Bræðslu verður svo kynnt sérstaklega þegar nær dregur, en miðasala á þá viðburði fer fram síðar,“ segir í tilkynningu.

Miðasala fer fram á vefsíðu hátíðarinnar braedslan.is.

Bræðslan Múlaþing Tónleikar á Íslandi