Fasteigna- og lóðagjöld íbúðarhúsnæðis eru lægst í Reykjavík

Nýtt fasteignamat íbúðarhúsnæðis var gefið út í gær og hækkar mikið milli ára, að jafnaði yfir landið um 19,9 prósent. Eftir einstökum sveitarfélögum er hækkunin allt frá rúmlega 8 prósentum upp í rúmlega 30 prósent. Strax í gær skapaðist umræða um að Reykjavík þyrfti að koma til móts við tekjulægstu heimilin með lækkun fasteignaskatts en nokkur önnur sveitarfélög á höfuðborgarsvæðinu hafa boðað slíka lækkun.

Dagur B. Eggertsson starfandi borgarstjóri segir þessi mál eins og önnur til umræðu í yfirstandandi viðræðum um myndun nýs meirihluta í borginni.

„Mér finnst ekkert óeðlilegt að öll sveitarfélög skoði þessi mál. Reykjavík hefur auðvitað verið með lægstu fasteignagjöldin á íbúðarhúsnæði árum saman. Það kæmi mér ekki á óvart að einhver sveitarfélög myndu færa sig nær okkur í því,“ segir Dagur.

Þjóðskrá eigi hins vegar eftir að gefa út nánari greiningu milli eldra og nýrra íbúðarhúsnæðis, opinberra bygginga, atvinnuhúsnæðis og svo framvegis. Þá komi betur í ljós hvort og þá hversu mikil hækkunin sé á einstakar húseignir.

Þegar álagningarprósenta fasteignaskatts fimmtán sveitarfélaga er skoðuð kemur í ljós að hún er lægst á Seltjarnarnesi og í Garðabæ, rétt undir 0,18 prósentunum sem hún er í Reykjavík. Fasteignaskatturinn einn og sér á íbúð með fasteignamat upp á 70 milljónir var frá 122.500 til 126 þúsund krónum í þessum þremur sveitarfélögum. Með hærri álagningu hækkar skatturinn síðan á íbúðir með sama fasteignamat upp í 140 þúsund í Kópavogi, 172.200 í Hafnarfirði og allt upp í 392 þúsund þar sem álagningin er mest á Ísafirði.

Ef við skoðum hins vegar fasteignaskattinn ásamt lóðarleigu þessara sömu sveitarfélaga breytist myndin töluvert. Þá er Reykjavík lægst með 149.660 krónur. Það þýðir að Kópavogur þyrfti að lækka fasteignaskatt sinn og lóðarleigu til samans um tæplega 8.500 krónur til að vera á pari við Reykjavík, Garðabær um 26 þúsund, Seltjarnarnes um tæpar 29 þúsund krónur, Mosfellsbær um 31 þúsund og Hafnarfjörður þyrfti að lækka þessi gjöld hjá sér um nærri 63 þúsund krónur.

Önnur sveitarfélög þyrftu að lækka gjöldin hjá sér enn meira í samanburðinum. Um allt frá rúmlega 124 þúsundum á Akureyri uppi í tæpar 339 þúsund krónur á Ísafirði.

Dagur segir að flokkarnir sem nú reyni meirihlutamyndun í borginni muni ræða undirbúning fjárhagsáætlunar næsta árs. Þar verði línur lagðar varðandi skatta, gjaldskrár og annað sem varði hag heimilanna.

„Við sjáum þegar allt er tekið saman að það er hagstæðast fyrir fjölskyldur að búa í Reykjavík. Ég á ekki von á öðru en við höfum metnað til að svo verði áfram.“

Þannig að þú ert að segja að borgin geti brugðist við hækkun fasteignagjalda með öðrum hætti til þeirra sem kannski standa lakast?

„Já, við höfum oft gert það. En þá höfum við bara skoðað þessa heildarmynd,“ segir Dagur B. Eggertsson.