Menningarveisla í Fjarðabyggð

„Viðburður sem þessi gefur lífinu lit. Gegnum list og menningu stuðlum við að jákvæðni og víðsýni og hér kvikna hugmyndir og forvitni fólks vaknar. Fjarðabyggð er afar frjó, hér er mikill áhugi á tónlist og fólk hefur gaman af að mæta á listviðburði. Hér búa margir skapandi einstaklingar og brottfluttir listamenn héðan fá þennan vettvang til að miðla sinni list sem og upprennandi listafólk sem starfar við skapandi sumarstörf hjá Fjarðarbyggð,“ segir Jóhann. Undirbúningur hefur staðið yfir allt undanfarið ár og á dagskránni er að finna bæði íslenska og erlenda listamenn endagskráin er afar fjölbreytt.

„Við vorum með opið kall eftir viðburðum og völdum inn á hátíðina. Þar á meðal er hljóðskúlptúristinn Mirian Kolev frá Búlgaríu sem mun magna upp rafbylgjur plantna og umbreyta þeim í hljóð. Ég mæli einnig með ljósmyndasýningu Alfredos Esparza, mexíkósk listamanns sem tekið hefur myndir af öllum húsum á Stöðvarfirði í mörg ár svo lesa má sögu húsanna gegnum árin og þar með breytingarnar í samfélaginu. 

Marc Alexander, bandarískur endurskoðandi sem flutti til Fáskrúðsfjarðar 2019 heldur myndlistasýningu í Beljandi brugghúsi og þá eru fjölbreytt tónlistaratriði af svæðinu á dagskránni, innsetningar, sviðsverk og gjörningar, ljóð, myndlistasýningar, hljóðlistasýningar og tónleikar og dreifst viðburðirnir um allt sveitarfélagið.

Þar má nefna tónleika Elísabetar Markar Ívarsdóttur frá Fáskrúðsfirði, Töfrandi tónar sem hún heldur í Mjóafirði og tónleika hljómsveitarinnar Brek í Randulffssjóhúsi á Eskifirði. Þá verður tónlistarmaðurinn Svavar Knútur með tvenna tónleika í Beljandi brugghúsi og með honum á öðrum tónleikunum verður Ína Berglind en hún er vaxandi tónlistarkona úr Fellabæ. 

Það er einmitt svo gaman að geta boðið upp á sýningar með listalífi af svæðinu. Brottfluttir listamenn halda einnig mikilvægum tengslum við heimabyggð. 

Selma Hreggviðsdóttir, myndlistakona frá Eskifirði og meðlimur Kling og bang verður til dæmis með afar spennandi sýningu, Cranioplasty í Þórsmörk á Neskaupstað.

Curver Thoroddsen verður með tónlistargjörning í Gömlu netagerðinni sem kallast Helvítis djöfulsins hávaði en Curver mun búa til einskonar kakófóníu úr mismunandi gítarriffum eins og honum einum er lagið. Sá gjörning tónar vel við tónlistarhátíðina Eistnaflug sem fram fer á sama tíma í Neskaupstað. Curver verður einnig með hljóðgjörningalistasmiðju fyrir krakka í Fjarðabyggð.

Húladúllan verður með ævintýralega ljósasýningu fyrir yngri kynslóðina í Valhöll á Eskifirði og þá fer fram dularfullur og magnaður seiður í fjörunni í Neskaupstað sömu helgi og Eistnaflug. Þá verður uppskeruhátíð Listavélarinnar sem er skapandi sumarstarf Fjarðabyggðar en hópurinn málar m.a. brú og mun sýna afrakstur sumarsins.

Þetta er aðeins brot af því sem boðið verður upp á en nánar er hægt að kynna sér dagskrána hér. Þá er aldrei að vita nema við bætist Popup viðburðir sem koma á óvart.“