Fyrsti sigur Erik ten Hag kom gegn Liverpool

Manchester United vann 2-1 sigur gegn erkifjendunum í Liverpool í stórleik umferðarinnar í ensku úrvalsdeildinni en þetta var aðeins annar sigurleikur United á Liverpool í síðustu 13 tilraunum.

Eftir tap í fyrstu tveimur umferðunum skildi Erik ten Hag, knattspyrnustjóri Manchester United, Cristiano Ronaldo og fyrirliðann Harry Maguire eftir á varamannabekknum fyrir leikinn í kvöld og það virtist ganga vel eftir þar sem United sem sótti sinn fyrsta sigur í ensku úrvalsdeildinni undir stjórn Hollendingsins.

 Stuðningsmenn United boðuðu til mótmæla fyrir utan Old Trafford gegn eigendum liðsins, Glazer fjölskyldunni. Það virtist þó ekki hafa slæm áhrif á leikmenn Manchester United því liðið byrjaði leikinn af krafti.

Jadon Sancho kom heimamönnum í forystu eftir einungis 16 mínútna leik. Sancho fékk þá tíma og pláss inn í vítateig Liverpool eftir undirbúning Anthony Elanga og kláraði færið sitt afar snyrtilega framhjá Alisson í marki Liverpool og heimamenn voru marki yfir í leikhléi.

Marcus Rashford tvöfaldaði svo forystu United snemma í síðari hálfleik. Rashford komst þá einn í gegn eftir frábæra stungusendingu frá Anthony Martial og Rashford tókst að koma boltanum í mark gestanna.

Mohamed Salah tókst þó að gera lokamínútur leiksins spennandi þegar hann skoraði af stuttu færi á 81. mínútu. Nær komust gestirnir þó ekki og leiknum lauk með 2-1 sigri Manchester United, við mikinn fögnuð þeirra stuðningsmanna United sem voru eftir í stúkunni.

Manchester United stekkur úr botnsæti deildarinnar og upp fyrir Liverpool með sigrinum. United er nú í 14. sæti með 3 stig á meðan Liverpool er í því 16. með 2 stig.