Sancho tryggði United þriðja sigurinn í röð

Jadon Sancho skoraði eina mark leiksins er Manchester United sótti Leicester heim í ensku úrvalsdeildinni í knattspyrnu í kvöld. Lokatölur 0-1 og United hefur nú unnið þrjá deildarleiki í röð eftir erfiða byrjun á tímabilinu.

Eftir að hafa tapað fyrstu tveimur leikjum tímabilsins hafa Rauðu djöflarnir í Manchester United heldur betur snúið genginu við. Liðið vann frækinn 2-1 sigur gegn Liverpool fyrir rúmri viku og fylgdi því eftir með 0-1 útisigri gegn Southampton um síðustu helgi.

Liðið er nú búið að vinna þrjá leiki í röð eftir sigur kvöldsins, en eins og áður segir var það Jadon Sancho sem skoraði markið sem skildi liðin að. Það gerði hann á 23. mínútu leiksins eftir stoðsendingu frá Marcus Rashford og niðurstaðan því 0-1 sigur United.

United situr nú í fimmta sæti deildarinnar með níu stig þegar fimm umferðum er lokið, sex stigum á eftir toppliði Arsenal. Leicester hefur hins vegar farið afar illa af stað og liðið situr á botni deildarinnar með aðeins eitt stig.